Ramazan Course

 

Ramazan Course (Part-1)

Roze ki Fazeelat :

Husool-e-barkat ke liye Ramazan-e-Mubarak ke roze rakhne ki kuch fazeelatein Hadees-e-Mubaraka mein aayi hain. Unmein se 1–2 main aap ko bata deti hoon, taaki Ramazan ki yaad taza ho jaye aur zehan bana rahe.

🌹Sarkar ﷺ ka farman hai : Saheeh Muslim aur Jame‘ Tirmizi wagairah mein yeh riwayat maujood hai ...

Mafhoom e Hadees hai ke jo shakhs Allah Ta‘ala ki raah mein ek din ka roza rakhe, yani sirf Allah Ta‘ala ke liye agar koi banda ek din ka roza rakhta hai, to Aaqa ﷺ farmaate hain ke Allah Ta‘ala us ke chehre ko Dozakh se 70 baras ki musafat door farma deta hai.

🌹Yani rozadaar ko Allah Ta‘ala Dozakh se itna door farma deta hai jitna fasla ek banda 70 saal tak chalte hue tay kare. Samajh sakte hain na..agar ek banda chalna shuru kare aur lagataar 70 saal tak chalta rahe, to woh kitni badi musafat tay karega? Yaqeenan bahut zyada fasla hoga..

Bas isi tarah Allah Ta‘ala ek roze ki barkat se us bande ko Dozakh se itni doori ata farma deta hai. Yeh Allah Ta‘ala ka fazl aur karam hai ke woh roze ki barkat se bandon par barkat, sawab aur yeh azeem nemat ata farmata hai ke unhein Jahannam se itna door farma deta hai..

Lekin is mein yeh shart hai ke roza usi tareeqe se rakha jaye jis tareeqe ka hukum Allah Ta‘ala aur Rasool Allah ﷺ ne humein diya hai.

Continue…

Ubaid-e-Raza Official

Ramazan Course (Part-2)

Roze ki Fazeelat :

🌹Nisaai, Tirmizi aur Ibne Majah ki riwayat hai ke rozedaar aur Jahannam ke darmiyan Allah Ta‘ala itni badi khandak (khai/gadha) paida farma deta hai jitna aasman aur zameen ke darmiyan faasla hai. Yani aasman aur zameen ke darmiyan jitna bada gap hai, utni hi badi khandak Allah Ta‘ala rozedaar aur Jahannam ke darmiyan bana deta hai... Matlab Allah Ta‘ala us bande ko Jahannam se itna door farma deta hai ke إن شاء الله عزوجل phir usko Jahannam ke qareeb bhi jaana naseeb nahi hoga....Toh yeh roze ki behtareen fazeelaton mein se ek azeem fazeelat hai.

🌹Ramazan-ul-Mubarak ki aur bhi bahut si fazeelatein hain. Is mubarak mahine mein nafil ka sawab farz ke barabar kar diya jata hai. Yani aam dinon mein jo farz ibadat hoti hai, uska sawab nafil se kahin zyada hota hai, lekin Allah Ta‘ala ne Ummat-e-Muhammadiya par yeh khaas karam farmaya hai ke Ramazan-ul-Mubarak mein jo nafil ibadat ki jati hai ... joh optional ibadat hoti hai, jiska karna sawab aur na karna gunah nahi .... us par bhi Allah Ta‘ala farz jitna azeem sawab ata farmata hai....

🌹Aur farz ibadat ke sawab ko 70 guna tak badha diya jata hai, yaani farz ke sawab mein 70 martaba izaafa kar diya jata hai.

🌹Toh yeh maahe mubarak kaseer rahmaton aur nematon se bhara hua hai... Iski aamad ka hamein intezar bhi karna chahiye aur Allah Ta‘ala se duaa bhi karte rehna chahiye ke Allah Ta‘ala hamein sehat, salamati aur aafiyat ke sath Mahe Ramazan ko paane ki sa‘aadat ata farmaye, aur is mein bharpoor ibadat karne ki taufeeq bhi ata farmaye...

🌹Yeh tha fazaail wagairah par kuch kalaam.

Ab masail-o-ahkaam ki taraf aate hain.

Continue…

Ubaid-e-Raza Official

Ramazan Course (Part-3)

🌹Roze Ki Tareef (Definition):

Musalman Ka Allah Ta‘ala Ki Raza Ke Liye Subah-E-Sadiq Se Le Kar Guroob-E-Aaftaab Tak Khane, Peene Aur Sohbat (Jismani Ta‘alluq) Se Rukne Ka Naam Roza Hai.

Ab Is Ta‘Reef Mein Maine Kai Shartein Bayan Kar Di Hain. Ab In Sharton Par Main Ek Ek Karke Aap Ko Kalaam Ke Zariye Samjhati Hoon Ke In Ka Matlab Kya Hai...

🌹Yaad Rakhein, Yeh Roze Ki Buniyadi Aur Basic Ta‘Reef Hai. Agar In Mein Se Koi Ek Bhi Cheez Maujood Na Ho, Toh Roza Sahih Nahi Hota...

Misal Ke Taur Par: Koi Banda Zahiri Taur Par Roza To Rakh Raha Hai, Lekin Sirf Formality Ke Liye....Is Wajah Se Ke Ghar Walay Roza Rakh Rahe Hain...Aur Us Ke Dil Mein Yeh Niyyat Hi Nahi Hai Ke Main Allah Ta‘ala Ki Khushi Aur Raza Ke Liye Roza Rakh Raha Hoon, Na Yeh Khayal Hai Ke Allah Ta‘Ala Is Se Raazi Ho...Bas Sirf Logon Ko Dekh Kar Roza Rakha Jaa Raha Hai...

Toh Yaad Rakhein, Aisa Roza Roza Hi Nahi Hota...

Is Liye Ke Yahan Roze Ki Ta‘Reef Hi Poori Tarah Sadiq Nahin Aati... Jab Ta‘reef Poori Na Ho, To Ibadat Bhi Poori Nahin Hoti... Is Liye Aisa Roza Bhi Kaamil Roza Nahi Kehlata...

Continue…

Ubaid-E-Raza Official

Ramazan Course (Part-4) 

 

To Roze Ki Ta‘reef Mein Jitni Bhi Conditions Bayan Ki Gayi Hain, Woh Sab Intehai Aham (Extremely Important) Hain. Agar In Mein Se Ek Bhi Point Idhar-Udhar Ho Jaaye, Toh Bande Ka Woh Roza Roza Nahi Kehlayega. Chahe Banda Yeh Samajhta Rahe Ke Mera Roza Ho Gaya, Lekin Aisa Roza Shumaar Hi Nahi Hota... 

Ab Ta‘reef Mein Sab Se Pehla Point Kya Tha? 

 

🌹 Musalman Ka Hona: 

Yaani Allah Ta‘ala Ne Roza Musalmanon Par Farz Kiya Hai. Is Liye Jo Shakhs Musalman Hoga, Usi Ka Roza Roza Shumaar Hoga. Yeh Baat Yaad Rahe Ke Agar Koi Kafir Ramazan Ke Mahine Mein Zahiri Taur Par Roza Rakhe, Toh Yeh Nahin Kaha Jaa Sakta Ke Allah Ta‘ala Usko Bhi Is Roze Ka Sawab Ata Farmayega ...معاذ اللہ ..Aisa Bilkul Nahin Hai... 

 

Is Ki Wajah Yeh Hai Ke Roza Musalmanon Par Farz Hai, Aur Jab Koi Musalman Hi Is Ibadat Ko Ada Kare, Tabhi Woh Shar‘an Roza Kehlata Hai. 

To Ta‘reef Ka Pehla Point Yahi Tha Ke Roza Sirf Musalman Ka Hi Maqbool Hota Hai. 

 

Continue… 

Ubaid-E-Raza Official

Ramazan Course (Part-5)

Roze ki Ta‘reef ke Points:

② Allah Ta‘ala Ki Raza Ke Liye (Yaani Allah Ta‘ala Ko Raazi Karne Ke Liye): Dekhiye, Hamari Jitni Bhi Ibadatein Hoti Hain, Woh Sirf Aur Sirf Allah Ta‘ala Ke Liye Hoti Hain. Allah Ta‘ala Ne Hamein Qur’an-e-Majeed Mein Roza Rakhne Ka Hukum Irshad Farmaya Hai. To Is Hukum Ki Ta‘meel Karne Aur Allah Ta‘ala Ki Raza Hasil Karne Ke Liye Roza Rakhna Hi Asal Roza Hai...

Is Mein Kahin Bhi, Kisi Bhi Qism Ki Koi Doosri Niyyat Shamil Nahin Honi Chahiye... Yeh Nahin Ke Sirf is Liye Roza Rakh Liya Ke Log Roza Rakh Rahe Hain, Ya Zabardasti Rakh Liya; Ya Shohar Ne Hukum Diya Is Liye Rakh Liya...Ya Maa-Baap Ke Kehne Par Rakh Liya...Ya Sirf Logon Ko Dikhane Ke Liye Ke “Main Bahut Zyada Rozedaar Hoon.”

Agar Kisi Ne Riyakari (Dikhawe) Ki Niyyat Se Roza Rakha, To Yaad Rakhein Ke Aisa Roza Roza Hi Nahin Hota... Is Liye Ke ibadat Mein Niyyat Ka Saaf Hona, ikhlas Ka Hona Zaroori Hai, Aur Roza Sirf Aur Sirf Allah Ta‘ala Ko Raazi Karne Ke Liye Hi Rakhna Chahiye.

To Yeh Roze Ki Ta‘reef Ka Doosra Point Ho Gaya Ke Jo Roza Allah Ta‘ala Ki Raza Ke Liye Rakha Jayega, Wahi Roza Shar‘an Count Hoga.

Continue…

Ubaid-e-Raza Official

Ramazan Course (Part-6) 

 

Roze Ki Ta‘reef Ke Points: 

 

③ Subh-E-Sadiq Se Guroob-E-Aaftaab Tak Khaane, Peene Wagairah Se Rukna: 

Ab Sawal Yeh Hai Ke Subh-E-Sadiq Kya Hai? Aur Guroob-E-Aaftaab Kya Hai? 

 

Aaasan Se Aasan Alfaaz Mein Agar Main Kahoon To Subh-E-Sadiq Us Waqt Ko Kehte Hain Jab Namaz-E-Isha Ka Waqt Khatm Ho Jaata Hai Aur Namaz-E-Fajr Ka Waqt Shuru Ho Jaata Hai... 

 

Ab Banda Roza Kab Se Kab Tak Rakhta Hai? 

Banda Roza Din Ke Waqt Rakhta Hai, Yaani Subh-E-Sadiq Se Le Kar Guroob-E-Aaftaab Tak... 

 

Yeh Point Bahut Zyaada Aham Hai, Kyun Ke Isi Se Roza Se Muta‘alliq Bahut Se Masail Samajh Mein Aa Jaate Hain..Khaaskar Subh-E-Sadiq Aur Guroob-E-Aaftaab Ke Waqt Se Muta‘alliq Masail. 

 

Ab Guroob-E-Aaftaab Kya Hai? 

Jab Suraj Bilkul Poori Tarah Doob Jata Hai, To Maghrib Ka Waqt Shuru Ho Jata Hai. Yani Asr Ka Waqt Khatam Aur Maghrib Ka Waqt Shuru Hona Hi Guroob-E-Aaftaab Kehlata Hai. 

To Yeh Tha Subh-E-Sadiq Aur Guroob-E-Aaftaab Ka Aasan Sa Bayan. 

 

Continue… 

Ubaid-E-Raza Official

Ramazan Course (Part-7)

📖 Subah-E-Sadiq Aur Guroob-E-Aaftaab Ki Tafseel:

Aksar Islami Behnein Is Baat Mein Pareshan Hoti Hain Ke Sehri Kab Tak Karni Hai Aur Sehri Kis Waqt Band Hogi. To Is Ka Jawab Bahut Simple Hai.

Aaj Smartphone Ka Zamana Hai, Jahan Hum Is Ka Istemal Hazaron Cheezon Ke Liye Karte Hain, To Achhe Aur Deen Ke Kaamon Ke Liye Bhi Iska Istemal Karna Chahiye...Is Liye Hamesha Apne Mobile Mein Namaz Ke Sahih Time Batane Wala Koi Achha Aur Qabil-E-Aitimad App Rakhein.

Jaise “Prayer Times” Yeh Ek Behtareen Hai, Jo Aap Ko Play Store Par Asaani Se Mil Jaata Hai. Is Ke Zariye Aap Ko Bilkul Durust Time Maloom Ho Jaata Hai..

Agar Aap Ke Paas Apne Shehar Ka Islamic Calendar Ya Namaz Timings Ka Chart Maujood Ho, To Woh Bhi Apne Paas Zaroor Rakhein. Phir Isi Ke Mutabiq Aap Aaram Se Dekh Sakti Hain Ke Roza Kab Shuru Ho Raha Hai, Sehri Kab Band Karni Hai, Aur Iftar Ka Waqt Kab Hai.

Is Tarah Kisi Bhi Qisam Ki Uljhan Ya Pareshani Baqi Nahin Rehti.

Continue…

Ubaid-E-Raza Official

Ramazan Course (Part-8)

Subah-E-Sadiq Aur Guroob-E-Aaftaab Ki Tafseel (Prayer Times App Ke Zariye):

Prayer Times App Ki Joh Image Upar Send Ki Gayi Hai, Use Ghaur Se Dekhiye. Yeh Hamare Shehar Ki Aaj Ki Tareekh Ki Namaz Timings Hain. Image Mein Yeh Wazeh Taur Par Dikhaya Gaya Hai Ke Fajr Ka Waqt 05:13 Minutes Aur 32 Seconds Par Shuru Ho Raha Hai. Yahi Subah-E-Sadiq Hoti Hai.

Is Ka Matlab Yeh Hua Ke Agar Mujhe Namaz-E-Isha Ada Karni Ho, To 05:13 Se Pehle Pehle Mujhe Isha Padh Leni Chahiye. Aur Namaz-E-Fajr Main 05:13 Minutes 32 Seconds Ke Baad Ada Kar Sakti Hoon...

Ab Yahan Se Ek Aur Aham Baat Samajh Aati Hai:

Agar Main Roza Rakhna Chahti Hoon, To Sehri Ka Aakhri Waqt Kitna Hoga?

To Jawab Yeh Hai Ke 05:13 Am Se Pehle Sehri Poori Tarah Finish Ho Jasni Chahiye...Chaahe Masjid Mein Azaan Kisi Bhi Waqt Ho Rahi Ho. Azaan Ka Masla Main Aage Chal Kar Wazeh Taur Par Bataungi, Lekin Sehri Band Karne Ka Asal Waqt Subah-E-Sadiq Hi Hota Hai...

Kyunke Mumkin Hai Ke App Mein Kabhi Kabhi Thoda Sa Error Ho Jaaye Ya Timing Aage-Peeche Ho Jaaye, Is Liye Ehtiyat Isi Mein Hai Ke 5–10 Minutes Pehle Hi Sehri Band Kar Di Jaaye. Kam Az Kam 5 Minutes Pehle Band Karna To Lazmi Samjhein.

Is Liye Behtar Yeh Hai Ke Taqreeban 05:07 Am Tak Sehri Wagairah Finish Kar Ke Roza Shuru Samajh Liya Jaaye...

Ab Aate Hain Guroob-E-Aaftaab (Sunset) Ki Taraf.

Image Mein Maghrib Ka Waqt 05:19 Minutes 55 Seconds (05:19:55 Pm) Diya Gaya Hai. Is Ka Matlab Yeh Hai Ke Suraj Poori Tarah Doob Chuka Hai Aur Maghrib Ka Waqt Shuru Ho Gaya Hai. Yani Iftari 05:19 Ke Baad Ki Jaayegi...

Yahan Par Bhi Ehtiyat Ke Taur Par 2–3 Minutes Ka Gap De Lena Behtar Hota Hai...Is Liye 05:22 Pm Ke Baad Iftari Kar Lena Zyada Mehfooz Aur Ehtiyati Tareeqa Hai.

Continue…

Ubaid-E-Raza Official

Ramazan Course (Part-9)

Subah-E-Sadiq Aur Guroob-E-Aaftaab Ki Tafseel:

Toh Ab Phir Se Yaad Kar Lein Ke Roze Ki Ta‘reef Kya Thi?

Allah Ta‘ala Ki Raza Ke Liye Musalman Ka...Subah-E-Sadiq Se Le Kar Guroob-E-Aaftaab Tak Khaane, Peene Aur Jismani Ta‘alluq Qayim Karne Se Rukna Roza Kehlata Hai...In Cheezon Se Bachne Ka Naam Hi Roza Hai..

Ab In Cheezon Ko Thoda Wazeh Samajh Lein:

Khana ... Yani Kisi Bhi Qism Ki Cheez Khane Se Bachna..

Peena .... Yani Kisi Bhi Qism Ki Cheez Peene Se Bachna...

Aur Teesri Cheez ... Miya Biwi Ka Jismani Ta‘alluq Qayim Karne Se Bachna...

Roze Ki Halat Mein Khana Bhi Haraam, Peena Bhi Haraam, Aur Jismani Ta‘alluq Qayim Karna Bhi Haraam Hota Hai... Jab Banda In Teenon Cheezon Se Bachta Hua Apna Roza Poora Karta Hai, To Sharayi Lehaaz Se Uska Roza Durust (Correct) Ho Jaata Hai....

Misal Ke Taur Par:

Ek Banda 05:12 am (Yaani Subah-E-Sadiq Se Pehle Hi) Khane, Peene Aur Jismani Ta‘alluq Se Ruk Jaata Hai, Aur Is Liye Rukta Hai Ke Woh Chahta Hai Ke Allah Ta‘ala Us Se Raazi Ho Jaaye. Phir Isi Halat Mein Woh Poora Din Guzarta Hai, Allah Ta‘ala Ki Ibadat Karta Hai, Namaz Ada Karta Hai...

Jab 05:19 pm Ke Baad (Guroob-E-Aaftaab Ke Baad) Allah Ta‘ala Ki Di Hui Nematon Se Iftari Karta Hai, To Is Tarah Uska Roza Poora Ho Jaata Hai.

Continue…

Ubaid-E-Raza Official

Ramazan Course (Part-10)

Azaan Tak Sehri Karna Kaisa? #01

To Dekhiye, Masjidon Mein Jo Azaan Dee Jaati Hai, Woh Koi Timing Alert Nahin Hoti. Aur Na Hi Yeh Aisa Hai Ke Azaan Se Hi Aap Ke Roze Ka Seedha Connection Ho.. Ya Azaan Se Hi Aap Ki Namaz Ka Waqt Shuru Hota Ho...Aisa Bilkul Nahi Hai....

Ab Sawal Yeh Hai Ke Azaan Kis Liye Dee Jaati Hai?

Azaan Is Liye Dee Jaati Hai Taake Logon Ko Ittila Dee Jaaye Ke Is Masjid Mein Thodi Der Baad Jama‘at Shuru Hone Wali Hai...

Mard Hazraat Masjid Mein Jaa Kar Ba-Jama‘at Namaz Ada Karte Hain. Unhein Batane Ke Liye Ke Azaan Ho Chuki Hai, Ab Thodi Der Mein Iqamat Hogi Aur Jama‘at Qayim Ho Jayegi...Lihaza Aap Apne Kaam-Kaaj Waghairah Samet Kar Masjid Ki Taraf Rukh Karein Aur Masjid Mein Aa Kar Ba-Jama‘at Namaz Ada Karein...

Bas Azaan Ka Asal Maqsad Yehi Hota Hai...

Is Ka Aap Ke Roze Se Koi Seedha Ta‘alluq Nahin Hota Ke Jaise Hi Azaan Hui Hum Sehri Band Kar Dein Ya Roza Khol Dein...Aisa Bilkul Nahin Hai...

Continue…

Ubaid-E-Raza Official

Ramazan Course (Part-11)

Azaan Tak Sehri Karna Kaisa? #02

Haan, Aam Taur Par Joh Yeh Kaha Jaata Hai Ke Azaan Se 20 Minutes Pehle Sehri Band Kar Dein.. Yeh Baat Is Liye Kahi Jaati Thi Ke Pehle Zamane Mein Logon Ko Bahut Zyada Confusion Hoti Thi Ke Sehri Kab Band Karein...

Is Liye Imaam Sahibaan Apni Masjidon Ke Timings Aur Subah-E-Sadiq Ke Waqt Ko Dekh Kar, Logon Ko Ehtiyatan Is Tarah Kah Diya Karte The, Taake Koi Galti Na Ho Jaaye.

Lekin Aaj-Kal Allah Ta‘ala Ke Fazl Se Aap Ke Paas Apps, Calendars Aur Namaz Timings Ki Sahulat Maujood Hai. Aap Apne Shehar Ke Reliable App Ya Calendar Se Seedha Waqt Dekh Sakte Hain, Is Liye Ab Confusion Ki Koi Khaas Wajah Nahi Rahi...

To Yaad Rakhein…

Yeh Zaroori Nahin Hota Ke Jaise Hi Waqt-E-Fajr (Subah-E-Sadiq) Dakhil Hua, Fauran Azaan De Dee Jaaye... Aisa Aam Taur Par Nahin Hota...

Umuman Hamare Yahan Jo Urf (Riwaaj) Hai.. Woh Yeh Hai Ke Namaz Ka Waqt Shuru Hone Ke Kuch Der Baad Azaan Dee Jaati Hai...

Maghrib Mein Toh Azaan Thodi Jaldi De Dee Jaati Hai.. Lekin Baaqi Namazon Mein Aksar 10 Minute, 20 Minute, Kabhi Kabhi Aadha Ghanta Baad Bhi Azaan Hoti Hai... Ya Phir Wahan Ke Logon Ki Jama‘at Ke Timings Ko Dekh Kar Azaan Dee Jaati Hai....

Is Liye Sirf Azaan Ko Buniyaad Bana Kar Sehri Band Karna Durust Tareeka Nahin Hai..Balke Asal Buniyaad Subah-E-Sadiq Ka Waqt Hota Hai...

Continue…

Ubaid-E-Raza Official

Ramazan Course (Part-12)

Azan Tak Sehri Karna Kaisa Hai? #03

🤔 Ab Misal Ke Taur Par:

Hamare Muhalle Mein Aksar Aisa Hota Hai Ke Waqt-E-Fajr (Subah Sadiq) Shuru Hone Ke Taqriban 20 Minute Baad Azan Dee Jaati Hai...

Ab Koi Shakhs Yeh Samajhta Hai Ke Azan Tak Khana-Peena Jaiz Hai, Aur Woh Khata-Peeta Rehta Hai.. Hatta Ke Jab Fajr Ki Azan Ho Rahi Hoti Hai To “حَیَّ عَلَی الصَّلوٰۃ ، حَیَّ عَلَی الْفَلَاح” Ke Aakhri Alfaaz Ke Dauran Bhi Woh Aakhri Niwale Aur Ghont Le Raha Hota Hai... Phir Niyat Karke Roza Shuru Kar Leta Hai....

🤔 To Kya Aisa Roza Shuru Hua?

Bilkul Bhi Nahi Hua....

Is Ki Wajah Kya Hai ?

Is Liye Ke Roze Ka Aaghaz Fajr Ke Waqt (Subah Sadiq) Se Hota Hai،.. Na Ke Azan Se...

Yahan Azan 20 Minute Dair Se Hui, Aur In 20 Minute Ke Dauran Jo Khana-Peena Hota Raha...Us Se Roza Hargiz Qayim Hi Nahi Hua....

🌹Agar Kisi Ne Apni Zindagi Mein Is Tarah Ke Mu‘amlaat Kiye Hain... Toh Us Par Farz Hai Ke:

🌟 Apna Hisab Lagaye Ke Kitne Roze Is Ghalat Fehmi Ki Wajah Se Zaya Hue...

🌟 Phir Un Tamam Rozon Ki Qaza Ada Kare..

🌹 Kaffara Lazim Nahin Hoga... Lekin Qaza Zaroori Hai....

🌹 Haan, Agar Aap Ke Muhalle Mein Bilkul Subah Sadiq Ke Saath Hi Azan Dee Jaati Ho (Jo Taqriban Mumkin Nahi Hota), Aur Aap Ko Yaqeen Ho Ke Aap Ne Subah Sadiq Ke Mutabiq Hi Sehri Band Ki Hai.. Toh Phir Roza Theek Hai...Warna Sirf Azan Ka Intezar Na Kiya Jaaye, Balke Sahi Timing Dekh Kar Sehri Band Kar Dee Jaaye....

Continue…

Ubaid-E-Raza Official

Ramazan Course (Part-13)

Azan Tak Sehri Karna Kaisa Hai? #04

🌹 Isi Tarah Maghrib Ki Azan To Maghrib Ka Waqt Dakhil Hone Ke Baad Hi Dee Jaati Hai...Is Liye Agar Kisi Ne Azan Sun Kar Iftari Kar Li, To Bilkul Theek Hai..

Kyun Ke Us Waqt Maghrib Ka Waqt Shuru Ho Chuka Hota Hai, Is Mein Koi Problem Nahin....

⏲️ Lekin Subah Sadiq Ke Waqt Yeh Masla Paida Hota Hai...

🤔 Agar Kisi Ko Kabhi Is Baat Ki Ghalat Fehmi Ho Jaaye...

🌟 Kabhi Timing Dekhne Mein Aage-Peeche Ho Gaya...

🌟 Kabhi Zehan Haazir Nahin Tha...Aur Usay Yeh Laga Ke Sehri Ka Waqt Abhi Baqi Hai...Aur Us Ne Sehri Kar Li, Baad Mein Pata Chala Ke Sehri Ka Waqt Khatam Ho Chuka Tha Aur Fajr Ka Waqt Shuru Ho Gaya Tha...

Ya......

Iftari Ke Waqt Yeh Samajh Liya Ke Maghrib Ka Waqt Shuru Ho Gaya Hai Aur Iftari Kar Li, Phir Baad Mein Maloom Hua Ke Maghrib Ka Waqt Abhi Shuru Hi Nahi Hua Tha, Balki Baad Mein Hua ....

🌹 To In Dono Sooraton Mein Roza Sahih Nahi Hoga...

Aisi Sooraton Mein Un Rozon Ki Qaza Karni Padegi...Haan, Kyun Ke Yeh Ghalti Bhool-Chook Aur Ghalat Fehmi Ki Wajah Se Hui Hai..Is Liye Koi Kaffara Lazim Nahi Hoga..

Lekin Qaza Lazmi Taur Par Ada Karni Hogi...

Continue…

Ubaid-E-Raza Official

Ramazan Course (Part-14)

Jin Jagahon Par Siren Wagairah Bajayi Jaati Hai, Wahan Siren Bajne Tak Sehri Karna Kaisa Hai?

Jin Ilaqon Mein Siren Sehri Ka Waqt Khatm Hone Par Bajayi Jaati Hai, Toh Siren Bajne Tak Khaana Peena Jaiz Hai...

Aur Agar Siren Ka Koi Yaqeeni Aur Mustanad Nizaam Na Ho, To Mobile Apps, Calendars Ya Sahi Timing Dekh Kar Hi Amal Kiya Jaaye....

Continue…

Ubaid-E-Raza Official

Ramazan Course (Part-15)

Roze Ki Niyat:

🌹 Roze Ki Niyat Hum Kab Karein?

Din Mein Karein Ya Raat Mein?

Aur Kis Qism Ke Roze Mein Raat Ko Niyat Zaroori Hoti Hai?....Yeh Sab Sawalaat Aksar Logon Ke Zehan Mein Confusion Paida Kar Dete Hain...

🌟 Is Mas’ale Ko Samajhne Ke Liye Sab Se Pehle Yeh Samajhna Zaroori Hai Ke Shari‘at-E-Mutahara Mein Din Kise Kehte Hain Aur Raat Kise Kehte Hain...

🌟 Aam Taur Par Hamare Yahan Raat Ka Tasawwur Yeh Hota Hai Ke Jab:

🤔 Aasman Mein Andhera Nazar Aane Lage..Jaise 7:30 Ya 8 Baje Ke Baad....

Aur Din Ka Tasawwur Yeh Hota Hai Ke Jab:

Kisi Ke Liye Subah 4 Baje..Ya 6 Baje...Ya Kisi Ke Liye Jab Suraj Poori Tarah Nikal Aaye, Taqriban 7 Ya 7:30 Baje...

🌹 Toh Hum Is Tarah Din Aur Raat Ka Hisaab Karte Hain۔...

Lekin !!!

Shari‘at Ka Qanoon Is Se Mukhtalif Hai۔...

⏲️ Din: Subah Sadiq Se Le Kar Guroob-E-Aaftaab Tak Hota Hai...

Yani Fajr Ka Waqt Shuru Hone Se Le Kar Maghrib Ka Waqt Dakhil Hone Se Pehle Tak Ka Waqt Din Kehlata Hai...

Continue…

Ubaid-E-Raza Official

Ramazan Course (Part-16)

Shari‘at-E-Mutahhara Mein Din Kise Kehte Hain Aur Raat Kise Kehte Hain?

🌹 Jab Bhi...Shari‘at-E-Mutahhara Mein Yeh Kaha Jaaye Ke

“Is Mas’ale Mein Din Mein Yeh Kaam Karna Hai”....

Ya...“Raat Mein Yeh Amal Karna Hai”...Toh Is Se Aam Logon Ka Samjha Hua Din...Raat Murad Nahin Hota...Balke Mazkoorah Waqt Muraad Hota Hai..

❤️ Misal Ke Taur Par:

Kabhi-Kabhaar Wazaif Diye Jaate Hain Aur Kaha Jaata Hai Ke Unhein Din Mein Poora Karo Ya Raat Mein Poora Karo..Is Ka Matlab Yeh Hota Hai Ke:

⏲️ Din: Subah Sadiq Se Le Kar Guroob-E-Aaftaab Tak...

⏲️ Raat: Guroob-E-Aaftaab Se Le Kar Subah Sadiq Tak...

Yaani:

Jab Subah Sadiq Ho Jaati Hai.. Wahin Se Din Shuru Ho Jaata Hai...

Aur Jab Guroob-E-Aaftaab Ho Jaaye...Wahi Se Raat Shuru Ho Jaati Hai..

To Yeh Hai Sharayi Din Aur  Sharayi Raat Ka Tasawwur..

Isi Liye Jab Bhi Masail Bayan Kiye Jayein, Ya Koi Bhi Shari‘at Se Muta‘alliq Mu‘amla Ho...Aur Us Mein Din Ya Raat Ka Lafz Aaye.. Toh In Timings Ko Zehan Mein Rakhna Zaroori Hota Hai...

Misal (Jaise Niche Image Mein Dikhaya Gaya Hai):

Aaj Hamare Shehar Ke Logon Ke Liye:

Din: Fajr 05:13 Am Se Shuru Hota Hai Aur 05:19 Pm Tak Rehta Hai... Isi Ko Din Shumaar Kiya Jayega..

Raat: 05:19 Pm Ke Baad Se Le Kar 05:12 Am Tak ..Is Poore Waqt Ko Raat Kaha Jayega...

🌹 To Yeh Do Points Wazeh Ho Gaye:

Din Kab Hota Hai..

Raat Kab Hoti Hai..

Ab Next Mas’ala Hai: Niyat Kise Kehte Hain?

Continue…

Ubaid-E-Raza Official

Ramazan Course (Part-17)

Niyat Kise Kehte Hain?

❤️ Niyat Dil Ke Irada Ko Kehte Hain..Yaani Jab Aap Dil Mein Pakka Faisla Kar Lete Hain Ke: “Mujhe Yeh Kaam Karna Hai”.... Is Decision Ko Hi Niyat Kaha Jaata Hai...

Agar Aap Ne Dil Mein Joh Irada Kiya Tha, Use Zubaan Se Bhi Bayan Kar Diya, To Yeh Achhi Baat Hai...Lekin Agar Aap Ne Zubaan Se Kuch Nahin Kaha.. Sirf Dil Mein Hi Pakka Iraada Maujood Tha.. To Bhi Yehi Niyat Kehlati Hai Aur Shar‘an Mo'atbar Hoti Hai..

Yeh Mas’ala Is Liye Bayan Kiya Jaa Raha Hai, Kyun Ke Aksar Kaha Jaata Hai Ke Roza Niyat Ke Sath Rakhna Zaroori Hai....

Yani Allah Ta‘ala Ki Raza Ke Liye Roza Rakhne Ka Iraada Dil Mein Hona Chahiye.....

🌹 Agar Kisi Shakhs Ke Dil Mein Roza Rakhne Ki Niyat Hi Nahi Thi..Aur Woh:

Na Khaya...Na Piya..Aur Na Hi Jismani Talluq Qayim Kiya...Lekin Subah Sadiq Se Le Kar.. Guroob-E-Aaftaab Tak Bas Yunhi Bina Irade Ke Raha...Toh Us Ka Roza Nahin Hoga...

Kyun?....

Is Liye Ke Roze Ke Sahih Hone Ke Liye Niyat Ka Hona Zaroori Hai...

Continue…

Ubaid-E-Raza Official

Ramazan Course (Part-18)

Toh Niyat Kya Hoti Hai.?

🌹 Niyat Dil Ke Iraade Ko Kehte Hain, Yaani Dil Mein Bande Ke Iraada Maujood Ho...Misal Ke Taur Par, Agar Abhi Raat Ka Waqt Chal Raha Hai Aur Banda Dil Mein Yeh Iraada Kar Leta Hai Ke Main Kal Allah Ki Raza Ke Liye Roza Rakhunga, Toh Yehi Niyat Hai...

🌹 Is Mein Zuban Se Bol Lena Behtar Hai, Laazim Ya Zaroori Nahin... Agar Dil Hi Dil Mein Niyat Maujood Ho Aur Zuban Se Kuch Na Bola Ho, Tab Bhi Roza Durust Ho Jaata Hai Aur Banda Gunahgaar Bhi Nahin Hota...

🌹 Yeh Zaroor Achhi Baat Hai Ke Jo Iraada Dil Mein Ho, Use Zubaan Se Bhi Ada Kar Liya Jaaye, Taake Jab Kaan Mein Apni Aawaz Padhti Hai To Zehan Zyaada Mutawajjah Ho Jaata Hai Aur Yeh Baat Dimag Mein Baith Jaati Hai Ke Haan, Main Yeh Kaam Allah Ke Liye Kar Raha Hoon.. Isi Wajah Se Kaha Jaata Hai Ke Niyat Zubaan Se Bhi Kar Li Jaaye...

🌹 Lekin Agar Zubaani Taur Par Niyat Na Bhi Ki Ho, Toh Bhi Roza Durust Ho Jaata Hai, Kyun Ke Niyat Asal Mein Dil Se Hoti Hai...

🌹 Haan, Niyat Kab Karni Chahiye, Aur Kis Waqt Se Kis Waqt Tak Niyat Ho Sakti Hai, Yeh Main Aage Ki Post Mein Samjhaungi.

Filhaal Itna Yaad Rakhein Ke Niyat Asal Mein Dil Ke Iraade Ko Kehte Hain...

Continue…

Ubaid-E-Raza Official

Ramazan Course (Part-19)

Niyat Ke Liye Kya Arabi Duaa Padhna Zaroori Hai.?

💐 Bahut Se Log Is Baat Par Pareshaan Ho Jaate Hain Ke Hum Sehri Ke Waqt Uth Kar Niyat Nahin Padh Paaye, Woh Jo Arabi Alfaaz Hain, Woh Hum Ne Nahin Padhe...

Jaise Log Ye Dua Yaad Kar Lete Hain:

نَوَيْتُ أَنْ أَصُومَ غَدًا لِلّٰهِ تَعَالٰى مِنْ فَرْضِ رَمَضَانَ

💐 Aur Kehte Hain Ke Hum Niyat Kar Rahe Hain...

Ab Agar Kisi Ko In Alfaaz Ka Matlab Hi Maloom Nahin, To Phir Yeh Kaunsi Niyat Hui.?...

Kyun Ke Niyat Kya Hai.?

👉 Dil Ka Iraada!!!

Jab Aap Ke Dil Ko Hi Yeh Maloom Nahin Ke Joh Arabi Alfaaz Aap Padh Rahe Hain Un Ka Tarjuma Kya Hai, To Kya Sirf Alfaaz Padh Lene Ko Niyat Qarar Dena Theek Hoga.?.

💐 Main Yeh Nahi Keh Rahi Ke Aap Duaa Na Padhein...

Lekin Baharhaal, Yeh Joh 

Itni Zyaada Ahmiyat De Dee Jaati Hai Ke Agar Woh Duaa Nahin Padhi To Roza Hi Nahin Hua, Yeh Soch Ghalat Hai....

💐 Baaz Log Yeh Samajh Lete Hain Ke Jab Tak Hum Ne Duaa Nahi Padhi, Ya Zawal Se Pehle Pehle Duaa Nahi Padhenge, Tab Tak Hamara Roza Shuru Hi Nahin Hua...

Is Ghalat Fehmi Mein Woh Baad Mein Khate-Peete Rehte Hain... معاذ الله...Aur Is Tarah Roza Todh Baithte Hain...Joh Ke Gunaah Hai..

💐 Baharhaal, Agar Dil Mein Kisi Bande Ki Niyat Maujood Hai, To Yeh Kaafi Hai....

Aur Agar Woh Zuban Se Bhi Bol Raha Hai, Chahe Arabi Mein, Toh Yeh Bhi Theek Hai, Kyun Ke Ahadees-E-Mubarkah Mein Duaaon Aur Niyat Ke Alfaaz Aaye Hain, To Padhna Chahe To Padh Sakta Hai....

💐 Lekin Agar Koi Arabi Duaa Nahi Padhta..Ya Zubaani Taur Par Niyat Nahin Karta...Ya Urdu Mein Kah Leta Hai Ke:

“Allah Ta‘Ala, Main Teri Raza Ke Liye Aaj Ka Roza Rakh Raha Hoon”

Toh Yeh Bhi Kaafi Hai...

Zaroori Nahin Ke Niyat Sirf Arabi Mein Hi Ki Jaaye.

Yaani Niyat Ko Arabi Mein Bolna Lazim Nahin...

👉 Roze Ke Liye Dil Mein Niyat Ka Ho Jaana Hi Kaafi Hota Hai...

Continue…

Ubaid-E-Raza Official

Ramazan Course (Part-20)

Sahri Karna Khud Ek Niyat Hai :

🥀 Teesra Point Yeh Yaad Rakhein Ke Jab Aap Sahri Ke Liye Uthte Hain, To Aap Ka Sahri Karna Khud Ek Niyat Hota Hai...

🥀 Aam Taur Par Banda Fajr Tak Sota Rehta Hai..Lekin Jab Woh Jaldi Uth Kar Khana Pakaata Hai, Sehri Tayyar Karta Hai Aur Sehri Karta Hai, To Ab Bhale Hi Us Ne Zuban Se Kuch Na Bola Ho, Phir Bhi Agar Us Ne Roza Rakh Liya, To Kya Us Din Ka Roza Ho Jayega.?

👉 Bilkul Ho Jayega..

🥀 Kyun Ke Jo Banda Aam Taur Par Sone Ka Aadatmand Hota Hai, Jab Woh Aadhi Raat Ko Uth Kar Sehri Bana Raha Hai, Sehri Kha Raha Hai, To Yeh Sab Be-Wajah Nahin Hota. Koi Bhi Itna Na-Samajh Nahin Hota Ke Bina Kisi Maqsad Ke Aadhi Raat Uth Kar Khaaye, Piye Aur Phir Poora Din Bhooka-Pyaasa Rahe...

🥀 Is Ka Sehri Karna Hi Is Baat Ki Daleel Hai Ke Us Ke Dil Mein Niyat Maujood Hai Ke Yeh Meri Sehri Hai.

Aur Sehri Kyun Karega.?

👉 Isi Liye Na Ke Use Poora Din Ka Roza Rakhna Hai...

🥀 Is Liye Yeh Baat Yaad Rakhein Ke Sirf Sehri Kar Lena, Chahe Zuban Se Kuch Na Bhi Bola Ho, Niyat Hi Mana Jayega...

Aur Is Soorat Mein Us Din Ka Roza Durust (Correct) Ho Jaata Hai...

Continue…

Ubaid-E-Raza Official

Ramazan Course (Part-21)

🌹Roze Ki Niyat Ka Waqt :

🪷 Teen Qism Ke Roze Aise Hain Jin Mein Raat, Yaani Guroob-E-Aaftaab Se Le Kar Subah Sehri (Subah Sadiq Se Pehle) Niyat Kar Lena Afzal Hai. Yaani Dil Mein Yeh Irada Ho Jaana Ke “Kal Main Subah Sadiq Se Roza Rakhunga / Rakhungi” .. Yeh Niyat Rehna Bohot Achchi Baat Hai...

🌺 Lekin Agar In Teen Rozon Mein Zawaal Se Pehle Pehle Bhi Niyat Kar Li Jaaye, To Niyat Durust Ho Jaati Hai...

Woh Teen Roze Kaun Se Hain?

🥀 Ramazan Ka Ada Roza..

🥀 Nafli Roza..

🥀 Nazr-e-Moaiyyan Ka Roza..

🌹 Ramazan Ka Ada Roza Kya Hota Hai?

🪷 Ramazan Ka Ada Roza Woh Hota Hai Jo Ramazan Ke Maheene Mein, Usi Waqt Ada Kiya Jaata Hai.

Aur Agar Ramazan Ka Waqt Guzar Jaaye Aur Ramazan Mein Roze Chhoot Gaye Hon, To Baad Mein Jo Roze Rakhe Jaate Hain Unhein Ramazan Ke Qaza Roze Kaha Jaata Hai....

🌺 Is Liye Yahan Baat Ho Rahi Hai:

🥀 Ramazan Ka Ada Roza..

🥀 Nafli Roza...

🥀nazr-E-Moaiyyan Ka Roza...

🌹 Nazr-E-Moaiyyan Ka Matlab Kya Hai?

🪷 Nazr Ka Matlab Hota Hai Mannat..Aur Moaiyyan Ka Matlab Hota Hai Fixed (Muqarrar)...

Kabhi Kabhaar Banda Allah Ta‘ala Se Mannat Maanta Hai Ke: “Ya Allah! Agar Mera Yeh Kaam Ho Gaya To Main Roza Rakhunga /Rakhungi.” Yeh Ho Gayi Nazr (Mannat)....

🪷 Agar Is Mannati Roze Ko Kisi Khaas Tareekh Ke Sath Fix Kar Diya Jaaye,

Jaise: “Agar Mera Falan Kaam Ho Gaya To Main 15 Sha‘ban Ko Roza Rakhunga /Rakhungi,”

To Yeh Kehlata Hai Nazr-e-Moaiyyan, Kyunki Ismein Tareekh Moaiyyan (Fixed) Kar Di Gayi...

🪷 Aur Agar Roze Ki Mannat Toh Ki Ho, Lekin Koi Tareekh Fix Na Ki, Toh Use Kehte Hain Nazr-r-Ghair-e-Moaiyyan,

Yaani Jiska Waqt Aur Tareekh Fixed Nahin Hoti..

Continue…

Ubaid-E-Raza Official

Ramazan Course (Part-22)

🌸 Roze Ki Niyat Ka Waqt :

🌷 Nazr-e-Moaiyyan Aur Nazr-e-Ghair-e-Moaiyyan

🌷 Agar Aap Ne Yeh Mannat Maani Ke “Mera Kaam Ho Gaya To Main 15 Sha‘ban Ko Roza Rakhunga/ Rakhungi” Aur Aap Ka Woh Kaam Ho Gaya, To Aainda Aane Wali 15 Sha‘ban Ko Roza Rakhna Aap Par Wajib Ho Jaata Hai.. Agar Is Roze Ko Ada Na Kiya Gaya To Gunahgaar Honge...

🌷 Aur Agar Aap Ne Mannat To Maani, Lekin Koi Tareekh Fix Nahi Ki, Jaise Aam Taur Par Kaha Jaata Hai: ..“Agar Mera Falan Kaam Ho Gaya To Main Roza Rakhunga/Rakhungi” ..Toh Is Surat Mein Koi Muqarrar Waqt Ya Tareekh Nahin Hoti...

Zindagi Mein Jab Bhi Mauqa Mile, Aap Is Roze Ko Rakh Sakte Hain..

🌷 Haan, Ramazan Ke Maheene Mein To Aap Ramazan Ke Ada Roze Hi Rakhenge...Aur Un 5 Din Ke Alawa Jin Mein Roza Rakhna Jaiz Nahin Balki Gunah Hota Hai..Baaqi Kisi Bhi Din Yeh Nazr-e-Ghair-E-Moaiyyan Ka Roza Rakha Jaa Sakta Hai...

🌷 Behtar Aur Afzal Yehi Hai Ke Agar Roze Ki Mannat Maani Hai To Foran Hi Use Poora Kar Diya Jaaye...Kyun Ke Zindagi Ka Koi Bharosa Nahin....Kya Maloom Kab Malak-ul-Maut Aa Kar Rooh Qabz Kar Le..Aur Kahin Aisa Na Ho Ke Hum Allah Ta‘ala Ki Bargah Mein Is Haal Mein Hazir Hon..Ke Koi Roza Ya Koi Ibadat Abhi Hamare Zimme Baaqi Ho..

🌷 Is Liye Koshish Yehi Honi Chahiye Ke Mannat Ko Jald Se Jald Ada Kar Liya Jaye...Lekin Phir Bhi, Agar Zindagi Mein Jab Bhi Ada Kar Di, To Woh Ada Ho Jaati Hai...

🌷 To Yeh Thi Wazahat:

Nazr-e-Moaiyyan .. Yaani Fixed Date Wali Mannat Ka Roza..Aur Nazr-e-Ghair-e-Moaiyyan .. Yani Jisme Tareekh Fixed Nahin Hoti...

Continue…

Ubaid-E-Raza Official

Ramazan Course (Part-23)

 

🌺 Roze Ki Niyat Ka Waqt :

🌸 Aur Yeh Point Yaad Rakhein…!!

Mannat Jab Aap Maante Hain, To Usi Waqt Mannat Maana Jaana Sabit Ho Jaata Hai, Yaani Usko Poora Karna Usi Waqt Aap Par Lazim Hota Hai, Jab Aap Ne Mannat Zaban Se Itni Aawaz Ke Saath Boli Ho Ke Aap Ke Kaanon Tak Woh Alfaaz Pahunch Gaye Hon.. Yaani Aap Ne Apni Mannat Ke Alfaaz Khud Sun Liye Hon...

 

🌸 Lekin Agar Sirf Dil Hi Dil Mein Iraada Kar Liya, Ya Dil Hi Dil Mein Allah Ta‘Ala Se Yeh Kaha Ke “Agar Mera Yeh Kaam Ho Gaya To Main Parso Peer Ka Roza Rakhungi” ... Na Zaban Hilayi, Na Kuch Kaha, To Agar Aisi Soorat Mein Aap Usko Poora Kar Bhi Lein To Koi Harj Nahin, Lekin Shariat Ki Taraf Se Aap Par Usko Poora Karna Lazim Nahin Hota....

🥀 Yani Is Soorat Mein Koi Sharayi Compulsion Paida Nahi Hota Ke Zaroor Hi Us Mannat Ko Poora Kiya Jaaye....

 

🌸 Haan, Agar Zaban Se Kaha, Aur Itni Aawaz Se Kaha Ke Apne Kaan Tak Woh Aawaz Aa Rahi Ho, Aur Apne Alfaaz Khud Sun Liye Hon, To Phir Mannat Muna‘qid Ho Jaati Hai.

Us Ke Baad Jab Woh Kaam Poora Ho Jaaye, Toh Aap Par Us Mannat Ko Poora Karna Lazim Ho Jaata Hai...

 

🥀 Chahe Namaz Ki Mannat Ho, Roze Ki Mannat Ho, Ya Kisi Aur Ibadat Ki Mannat Ho, Isi Tarah Sadqa Karne Ki Mannat Ho...Har Sharayi Mannat Ko Poora Karna Zaroori Hota Hai...

 

Continue…

Ubaid-E-Raza Official

Ramazan Course (Part-24)

🪷 Roze Ki Niyat Ka Waqt :

🌷 Ab Aate Hain Roze Ki Niyat Ki Taraf. Main Ne Arz Kiya Tha Ke 3 Tarah Ke Roze Hote Hain:

🌷 Ramazan Ka Ada Roza

🌷 Nafli Roza

🌷 Nazr-E-Mu‘ayyan Ka Roza Yaani Fixed Date Wali Mannat Ka Roza.

🪷 In Teeno Qismon Mein Agar Raat Mein Niyat Kar Li Jaye To Behtar Aur Achhi Baat Hai, Lekin Agar Raat Mein Niyat Na Ho Sake To Zawal Se Pehle Pehle Niyat Ki Jaa Sakti Hai.

🌷 Ab Asal Mas’ala Kya Hai, Isko Samjhiye:

🪷 (1) Ramazan Ka Ada Roza:

🌷 Ramazan Ke Ada Roze Mein To Yeh Problem Aati Hi Nahin... Kyun?

Is Liye Ke Jaise Hi Ramazan Ka Chand Nazar Aane Ka Ailan Hota Hai, Usi Waqt Se Hamare Dilon Mein Roza Rakhne Ki Niyat Maujood Hoti Hai...

🌷 Chand Ka Ailan Hote Hi Hum Zehni Taur Par Tayyar Ho Jaate Hain Ke Ab Sehri Karni Hai Aur Agle Din Roza Rakhna Hai...Kya Kabhi Aap Ke Dil Mein Yeh Hota Hai Ke “Main Kal Roza Nahin Rakhungi”?

Aisa Aam Taur Par Bilkul Nahin Hota....

🌷 Balke Dil Mein Yehi Hota Hai Ke Main Roza Rakhungi, Isi Liye Ramazan Ke Ada Roze Mein Niyat Ka Mas’ala Paida Hi Nahin Hota, Kyun Ke Chand Nazar Aate Hi Niyat Dil Mein Maujood Hoti Hai...

🪷 Next: Nafli Roza…

Continue…

Ubaid-E-Raza Official

Ramazan Course (Part-25)

💐 Roze Ki Niyat Ka Waqt :

🥀 (2) Nafli Roza:

Nafli Roze Mein Aam Taur Par Yeh Hota Hai Ke Jab Roza Rakhna Hota Hai To Hum Pehle Se Tayyari Kar Lete Hain, Sehri Wagairah Ke Liye Uthte Hain, Aur Dil Mein Yeh Iraada Hota Hai Ke Kal Roza Rakhna Hai...

🥀 Jaise Rajab Ka Mahina Chal Raha Ho Aur Us Mein Roza Rakhna Ho, To Raat Hi Mein Niyat Kar Li Jaati Hai Ke Kal Nafli Roza Rakhna Hai.

🥀 Yaani Guroob-e-Aaftaab Se Le Kar Subah Sadiq Tak, Agar Dil Mein Yeh Iraada Maujood Ho Ke Main Kal Nafli Roza Rakhungi, Toh Yehi Niyat Hai...

💐 Aur Kabhi Kabhaar Aisa Bhi Hota Hai Ke Raat Mein Koi Iraada Nahin Hota, Phir Subah 8 Ya 9 Baje Aankh Khulti Hai, Aur Banda Sochta Hai Ke Aaj Mausam Achha Lag Raha Hai, Aaj Roza Hi Rakh Leta/Leti Hoon. Aur Subah Se Kuch Khaya-Piya Bhi Nahin Hota, To Woh Kehta/Kehti Hai Ke Roza Hi Rakh Leta/Leti Hoon...

🥀 Ab Yahan Yeh Sawal Paida Hota Hai Ke Kya Ab Niyat Ki Jaa Sakti Hai Ya Nahin?...

💐 Chunanche Kyun Ke Yeh Nafli Roza Hai, Is Mein Zawal Se Pehle Pehle Niyat Ki Jaa Sakti Hai.

Is Tarah Niyat Kare Ke: Allah Ta‘ala, Main Aaj Subah Sadiq Se Hi Roze Se Hoon, Aur Usi Waqt Se Apne Aap Ko Rozedaar Samjhe .. To Yeh Roza Ho Jaayega.

💐 Haan…!! Behtar To Yeh Tha Ke Sehri Wagairah Kar Li Jaati, Lekin Phir Bhi Agar Is Tarah Achanak (Sudden) Niyat Kar Li, To Zawal Se Pehle Pehle Yeh Niyat Durust Hai...

Lekin Zawal Ke Baad Niyat Karna Durust Nahin Ho Sakta..

Continue…

Ubaid-E-Raza Official

Ramazan Course (Part-26) 

 

🌹 Roze Ki Niyat Ka Waqt : 

🌸 Ab Zawal Ke Baad Niyat Karna Durust Nahin Hota... 

🌺 Misal Ke Taur Par, Zohar Ka Waqt Ho Gaya, Maan Lijiye 2 Baje, Aur Banda Yeh Soche Ke Subah Se Kuch Nahin Khaya-Piya Hai, Na Nashta Kiya, Na Doodh Piya, Toh Ab Yeh Kehna Ke Abhi Roze Ki Niyat Kar Leta Hoon, Roza Toh Aadha Ho Hi Gaya Hai, Baqi Aadhe Mein Niyat Kar Leta Hoon...Yeh Durust Nahin Hai...Is Tarah Zawal Ke Baad Niyat Nahin Ki Jas Sakti.... 

 

🌺 Lekin Agar Achanak (Sudden) Faisla Ho Jasye, Jaise Subah Uth Kar Yeh Socha Ke Aaj Roza Rakh Lena Chahiye, To Nafli Roze Ki Niyat Zawal Se Pehle Pehle Ki Jaa Sakti Hai... 

 

🌺 Haan, Is Mein Ek Zaroori Shart Yeh Hai Ke Subah Sadiq Ke Baad, Jab Se Roza Shuru Hota Hai, Na Kuch Khaya-Piya Ho, Aur Na Hi Koi Aisa Kaam Kiya Ho Jisse Roza Toot Jaata Hai, Jaise Jismani Talluq Qayim Karna Wagairah. 

🌸 Agar In Cheezon Mein Se Kuch Bhi Nahin Kiya, Toh Phir Is Tarah Achanak Ki Gayi Niyat Bhi Durust Hoti Hai, Aur Nafli Roza Sahih Ho Jaata Hai... 

 

Continue… 

Ubaid-E-Raza Official

Ramazan Course (Part-27)

🌺 Roze Ki Niyat Ka Waqt :

🌹 (3) Nazr-E-Mu‘ayyan Ka Roza:

Nazr-e-Mu‘ayyan Ka Roza Misal Ke Taur Par Yeh Hai Ke Kisi Aurat Ne Mannat Mani Ke Agar Mera Bachcha Theek Ho Gaya To Main 1 Shaban Ko Roza Rakhungi...Aur Itni Aawaz Se Boli Ke Uske Kaanon Tak Aawaz Aa Gayi...

Phir Jab Uska Bachcha Theek Ho Gaya, To Ab Us Par Lazim Ho Gaya Ke Woh 1 Shaban Ka Roza Rakhe, Kyun Ke Yeh Nazr-e-Mu‘ayyan (Fixed Date Wali Mannat) Hai...

🌺 Ab Yeh Hua Ke 1 Shaban Se Pehle Wali Raat, Misal Ke Taur Par 30 Rajab, Uske Dil Mein Khayal Aaya Ke Mujhe To 1 Shaban Ka Roza Rakhna Chahiye Tha, Lekin Mera Dil Nahi Kar Raha, Ajeeb Si Kaifiyat Mehsoos Ho Rahi Hai, Pata Nahi Main Kar Sakungi Ya Nahin...

🌺 Yahan Tak Ke Usne Dil Mein Yeh Iraada Kar Liya Ke Kal Main Roza Nahin Rakhungi..Halaanke Roza Rakhna To Zaroori Tha, Lekin Kabhi Kabhaar Insaan Se Kotahi Ho Jaati Hai, To Usne Raat Ko Hi Niyat Kar Li Ke Main Kal Roza Nahi Rakhungi, Aur Roza Nahin Rakha...

🌹 Phir Subah 9 Baje Uski Aankh Khuli, Aur Use Yaad Aaya Ke Aaj To Wahi Date Hai Jo Maine Fix Ki Thi..1 Shaban..Ab Usne Socha Ke Jab Main Subah Se Kuch Khaayi-Piyi Bhi Nahin Hoon, Aur 9 Baje Hi Hue Hain, To Kyun Na Abhi Niyyat Kar Loon...

🌹To Is Soorat Mein Woh Niyyat Kar Sakti Hai, Kyun Ke Nazr-e-Mu‘ayyan Ke Roze Mein Bhi, Agar Is Tarah Achanak (Sudden) Faisla Ho Jaaye, To Zawal Se Pehle Pehle Niyyat Durust Ho Jaati Hai.

🌺 To Yeh Woh 3 Qisam Ke Roze Hain..

🌹 Ramazan Ka Ada Roza

🌹 Nafli Roza

🌹 Nazr-e-Mu‘ayyan Ka Roza...

🌹 In Teeno Mein Raat Ko Niyyat Ho Jaana Behtar Hai, Aur Aam Taur Par Hamare Yahan Aisa Hi Hota Hai...Lekin Agar In Teenon Rozon Mein Aisa Ho Jaye Ke Banda Achanak Dusre Din Roza Rakhne Ka Faisla Kar Le, To Zawal Se Pehle Pehle Niyyat Kar Sakta Hai..

🌺 Shart Yahi Hai Ke Subah Sadiq Ke Baad...

🌹 Na Kuch Khaya-Piya Ho,

🌹Na Jismani Talluq Qayim Kiya Ho,

🌹 Aur Na Hi Koi Aisa Kaam Kiya Ho Jis Ki Wajah Se Roza Toot Jata Hai...

Agar Yeh Shart Poori Ho, Toh Is Tarah Ki Niyyat Se Roza Durust Ho Jaata Hai.

Continue…

Ubaid-E-Raza Official

Ramazan Course (Part-28)

🌺 Roze Ki Niyat Ka Waqt :

🌹 To Ab Inke Ilawa Jitne Bhi Roze Hain, Maine Aap Ko Kaun Se 3 Roze Bataye The?

(1) Ramazan Ka Ada Roza,

(2) Nafli Roza,

(3) Nazr-E-Mo‘Ayyan Ka Roza.

🌹 In Teenon Rozon Mein Niyat Ka Waqt Zara Wasee' Hota Hai. Yaani Agar Koi Shakhs Sudden Decision Bhi Kar Le, To Zawal Se Pehle Pehle Niyat Kar Sakta Hai, Bashart Ke Subah Se Us Waqt Tak Roza Todne Wali Koi Cheez Na Paayi Ho.

🌺 Iske Ilawa Jitne Bhi Roze Hain, Un Sab Mein Niyat Ka Aakhri Waqt Raat Hota Hai. Yani Subah Sadiq Se Pehle Pehle Niyat Ka Hona Zaroori Hai. Agar Subah Sadiq Ke Baad Niyat Ki, To Woh Niyat Mo'atbar Nahin Hogi...Aur Agar Aise Mein Roza Rakh Bhi Liya, To Woh  Nafil Count Hoga, Jiski Niyat Ki Gayi Thi Woh Roza Ada Nahin Hoga...

🌺 Misal Ke Taur Par:

Ramazan Ke Ada Roze, Nafli Roze Aur Nazr e Mo‘ayyan Ke Ilawa Yeh Roze Shamil Hain:

🥀 Ramazan Ka Qaza Roza..

🥀 Nazr e Ghair e Mo‘ayyan Ka Roza...

🥀 Kaffare Ke Roze...

🥀 Zihar Ke Kaffare Ke Roze...

🥀 Qasam Ke Kaffare Ke Roze...

🥀 Isi Tarah Agar Koi Haji Qurbani Ki Qudrat Na Rakhta Ho Aur Uske Liye Roza Rakhna Laazim Ho, To Woh Bhi Isi Qism Mein Aata Hai...

🌹 To Nateeja Ye Hua Ke In Teen Rozon Ke Ilawa Jitne Bhi Roze Hain, Un Sab Mein Sudden Decision Ka Option Nahin Hai. Un Tamam Rozon Ke Liye Raat Hi Mein Niyat Karna Zaroori Hai...

Continue…

Ubaid-E-Raza Official

Ramazan Course (Part-29)

🌸 Roze Ki Niyat Ka Waqt :

💐 Teen Rozon Ke Ilawa Baqi Jitne Bhi Roze Hain, Un Sab Mein Raat Hi Mein Niyat Karna Zaroori Hota Hai...

⏲️ Ab Sawal Ye Hai Ke Raat Ka Waqt Kab Se Kab Tak Hota Hai?

🌸 Yaani Magrib Se Le Kar Next Morning Subah Sadiq Shuru Hone Se Pehle Pehle Dil Mein Ye Iraada Kar Lena Ke Agle Din Main Roza Rakhunga/Rakhungi....

💐 Misal Ke Taur Par:

Kisi Aurat Ke Haiz Ki Wajah Se Ramazan Ke Roze Baaqi Rah Gaye Hain Aur Ab Uski Qaza Karni Hai. To Ab Woh Kya Karegi?

💐 Agar Usne Ye Socha Ke Kal Mujhe Ramzan Ka Qaza Roza Rakhna Hai, To Uske Liye Aaj Raat Mein Niyat Karni Zaroori Hogi.

Yaani Dil Mein Yeh Final Decision Kar Lena Hoga Ke Kal Main Ramzan Ka Qaza Roza Rakhungi...

🌸 Ab Ye Decision Kab Se Kab Tak Hona Chahiye?

Magrib Se Le Kar Subah Sadiq Se Pehle Tak Dil Mein Ye Iraada Kar Lena Zaroori Hai Ke Kal Roza Rakhna Hai....

💐 Ab Agar Misal Ke Taur Par Aaj Raat Mein Koi Decision Hi Nahin Karti,

Aur Agli Subah 10 Baje Uth Kar Ye Sochti Hain Ke Main Subah Se Bhuki Hoon..Koi Roza Todne Wala Amal Bhi Nahin Kiya..Chalo Ab Niyat Karke Qaza Roza Rakh Leti Hoon..

Toh Kya Yeh Qaza Roza Mana Jayega?..

🌸 Nahin…!..Kyunke Qaza Roze Ke Liye Raat Mein Niyat Karna Zaroori Tha..

Ab Jo Ye Sudden Decision Liya Gaya Hai, Ye Work Out Nahin Karega...

💐 Aur Jo Aaj Ka Roza Rakha Gaya Hai, Woh Qaza Ke Bajaye Nafil Roza Count Hoga...

🌸 To Yeh Hai Niyaton Ka Mas’ala...

Continue…

Ubaid-E-Raza Official

Ramazan Course (Part-30)

🌹 Roze Ki Niyat Ka Waqt :

🌷 Ummeed Hai Ke Ab Iske Baad Koi Confusion Nahin Hogi..Kyunke Aam Taur Par Jab Log Bahaare Shariat Wagairah Ya Aur Fiqhi Kitaabein Padhte Hain, To Wahan Likha Hota Hai Ke Raat Mein Niyat Karna Zaroori Hai.. Toh Log Pareshaan Ho Jaate Hain.

Woh Sochte Hain: “Are! Hum Ne To Raat Mein Niyat Hi Nahin Ki Thi.”...

🌷 Aksar Log Raat Ki Niyat Ka Matlab Ye Samajh Lete Hain Ke Koi Duaa Padhna Zaroori Hai...Ab Koi Aurat Ye Sochti Hai Ke “Main Kal Qaza Ka Roza Rakhna Chahti Hoon, Lekin Raat Mein Maine Koi Duaa Nahin Padhi, To Kya Mera Roza Nahin Hua?”

Is Tarah Ke Khayalaat Aa Jaate Hain.

🌹 To Yaad Rakhiye, Aisa Kuch Bhi Nahin Hai...

Agar Raat Hi Mein Dil Mein Decision Ho Gaya Tha..Zehan Mein Ye Baat Thi Ke Mujhe Roza Rakhna Hai..Aur Aisa Bhi Ho Gaya Ke Sehri Mein Aankh Hi Nahin Khuli..Tab Bhi Koi Problem Nahin...

🌹 Aksar Aisa Hota Hai Na Ke..Jaise Samjhiye Maine Raat Mein Niyat Kar Li Ke Kal Mujhe Qaza Roza Rakhna Hai..Aur Phir So Gayi..Phir Fajr Ka Waqt Dakhil Hone Ke Baad Aankh Khuli..Toh Ab Kyunke Raat Se Iraada (Niyat) Maujood Tha... Toh Main Yehi Samjhungi Ke Subah Se Main Roze Se Hoon...Aur Mera Qaza Roza Durust Ho Jayega..Kyunke Raat Se Decision (Iraada) Tha...

🌹 Haan!..Agar Koi Fajr Ke Baad Uth Kar Phir Sudden Decision Leti Ke Ab Main Qaza Ka Roza Rakhungi..Toh Ab Ijazat Nahin Hoti...

Continue…

Ubaid-E-Raza Official

Ramazan Course (Part-31)

🪻 Sehri Aur Iftar Ki Du‘aa Padhne Ka Mas’ala :

Du‘aa-e-Sehri Padhna Lazim O Zaroori Nahin Hai.

Ye Baat Main Aap Ko Pehle Hi Samjha Chuki Hoon. Haan, Agar Padh Li Jaaye To Achhi Baat Hai. Niyat Ki Du‘aa Wagairah Bhi Padhna Achchi Baat Hai...

🪻 Isi Tarah Du‘aa-E-Iftar Ka Bhi Hukm Hai... Du‘aa-E-Iftar Padhna Bhi Lazim O Zaroori Nahin. Albatta Du‘aa-E-Iftar Sarkar ﷺ Se Ahadees Ke Zariye Manqool Hai, Is Liye Ye Sunnat E Mubaarakah Hai...

🪻 Yaani Agar Banda Du‘aa-E-Iftar Padhta Hai To Sawab Ka Mustahiq Hoga, Lekin Agar Na Padhe To Gunahgaar Nahin Hoga. Ye Sunnat-E-Muakkadah Ke Darje Mein Nahin Aati, Balki Ghair-Muakkadah Ke Darje Mein Shumaar Ki Jaayegi...

🪻 Is Liye Natija Ye Hua Ke:

🥀 Padhenge To Sawab Milega...

🥀 Na Padhenge To Koi Gunaah Nahin..

Continue…

Ubaid-E-Raza Official

Ramazan Course (Part-32)

🌟 Sahri Aur Iftar Ki Du‘a Padhne Ka Mas’ala :

Ek Aur Doubt Logon Ke Zehan Mein Hota Hai Ke Ye Du‘a Kab Padhi Jaaye?

Iftaar Se Pehle Ya Iftaar Ke Baad? Is Mas’ale Par Kaafi Zyada Confusion Paayi Jaati Hai, Halaan Ke Asal Mein Isme Confuse Hone Wali Koi Baat Hi Nahin... Aur Na Hi Isko Itna Bada Issue Banane Ki Zaroorat Hai...Kyun Ke Yeh Zyaada Se Zyaada Sunnat Ke Darje Mein Aata Hai...

🎍 Ajeeb Baat Ye Hai Ke Log Hazaaron Rozon Mein Badi Badi Galtiyan Kar Rahe Hote Hain, Lekin Un Par Tawajjoh Nahin Hoti.

Kahin Waqt Ke Confusion Ki Wajah Se Sehri Ka Waqt Khatm Hone Ke Baad Khaa Pee Rahe Hote Hain..

Ya Iftari Ka Waqt Shuru Hone Se Pehle Kha Pee Lete Hain ... Iski Koi Parwah Nahin Hoti...

🤔 Lekin Tension Is Baat Ki Hoti Hai Ke Du‘a-e-Iftar Kab Padhi Jaaye?

🌟 Ye Hamare Sochne Ka Tareeqa Hai Ke Jo Zaroori Masail Hain, Un Par Hamara Focus Nahin Hota, Aur Jo Itne Aham Nahin, Unhein Hum Mas’ala Bana Lete Hain...

🎍 Baharhaal, Du‘a-e-Iftar Jo Mashhoor Hai, Wo Sarkar ﷺ Se Marvi Hai. Aur Wo Du‘a Iftari Karne Ke Baad Padhi Jaaye Yaani Khajoor, Paani Wagairah Se Pehle Iftari Kar Li Jaaye, Phir Du‘a Padhi Jaaye...

🌟 Iski Wajah Ye Hai Ke Is Du‘a Mein Jo Alfaaz Istemal Huye Hain, Wo Past Tense (Seegha E Maazi) Ke Hain:

”اللّٰهُمَّ لَكَ صُمْتُ وَعَلٰى رِزْقِكَ اَفْطَرْتُ“

Ye Alfaaz Hadeese Mubarakah Ke Hain...

🎍 Aaj Kal Kuch Log Ismein Mazeed Izafa Kar Dete Hain, Jaise:

”اَللّٰهُمَّ اِنِّيْ لَكَ صُمْتُ وَبِكَ آمَنْتُ وَعَلٰى رِزْقِكَ اَفْطَرْتُ“

Aur Isi Tarah Aur Bhi Kuch Alfaaz Shamil Kar Diye Jaate Hain...

🌟 Is Du‘a Mein Jitne Bhi Lafz Hain Jaise صُمْتُ Aur اَفْطَرْتُ, Jo Log Grammar Jaante Hain Wo Samajhte Hain Ke Ye Sab Past Tense Mein Hain..

Yani: “Maine Allah Ke Liye Roza Rakha Aur Allah Ke Diye Huye Rizq Se Iftaar Kar Chuka.”

🎍 Ab Jab Aap Ne Abhi Iftari Ki Hi Nahi Aur Du‘a Padh Rahe Hain Ke “Main Iftari Kar Chuka”, To Ye Baat Zahiri Taur Par Theek Nahi Lagti...

Isi Liye Kaha Jaata Hai Ke Pehle Iftari Kar Li Jaaye, Phir Allah Ta‘ala Ka Shukr Ada Kiya Jaaye Ke “Ya Allah! Tere Diye Huye Rizq Se Maine Iftaar Kar Li.”

🌟 Chunke Ye Du‘a Past Tense Mein Hai, Is Liye Munasib Aur Behtar Yehi Hai Ke Isko Iftari Ke Baad Padha Jaaye...

🎍 Lekin Agar Koi Iftari Se Pehle Bhi Padh Leta Hai, Ya Bilkul Na Bhi Padhe, To Ismein Koi Harj Aur Gunaah Ki Baat Nahin.

Continue…

Ubaid-E-Raza Official

Ramazan Course (Part-33)

🌹 Sabse Pehle Aapko Yeh Yaad Rakhna Hai Ke Roza Kis Par Farz Hota Hai?..

Yeh To Aap Samajh Chuke Ke Roza Kya Hai, Niyat Wagairah Kab Ki Jaati Hai. Ab Sawal Yeh Hai Ke Roza Farz Kis Par Hota Hai, Yaani Kin Logon Par Laazim Hai Ke Wo Roza Rakhen?

🌺 Toh  Shariat E Mutahhara Ne Har Aaqil, Baligh, Musalman (Mard Ho Ya Aurat) Par Roza Farz Kiya Hai...

🪻 Aaqil Ka Matlab: Jiski Aqal Salamat Ho. Aise Shakhs Par Roza Farz Hai.

🪻 Phir Baligh Hona Zaroori Hai. Na-Baligh, Yaani Chhote Bachchon Par Roza Farz Nahin Hota...

🌹 Agar Chhote Bachche Khud Shauq Se, Badon Ko Dekh Kar Roza Rakhne Ki Koshish Karte Hain, Toh Yeh Ek Achhi Baat Hai. Aise Mein Unhein Ijazat De Deni Chahiye, Kyunki Un Par Roza Farz Nahin Hota...

🌺 Bil-Farz Agar Bachcha Roza Poora Na Rakh Paaye Aur Pyaas Ki Shiddat Ki Wajah Se Pani Pee Le, Ya Kuchh Kha Le, Toh Na Bachche Par Koi Gunaah Hai..Na Walidain Par Koi Gunaah Hai...

🪻 Haan! Walidain Ne Jo Bachche Ki Tarbiyat Ke Liye Koshish Ki...Ke Bachpan Se Hi Usko Namaz Aur Roze Ka Aadat-Mand Banaya..Is Par Unhein Sawab Milega, Gunaah Nahin....

🌹 Aur Yeh Bhi Yaad Rahe Ke Agar Bachche Ne Roza Todh Diya, To:

🪻 Na Us Par Qaza Hai..

🪻 Na Koi Kaffara..

🪻 Aur Kisi Qisam Ki Zimmedari Bhi Nahin Hoti...

Continue…

Ubaid-E-Raza Official

Ramazan Course (Part-34)

☘️ Chhote Bachchon Ka Roza :

Agar Chhote Bachche Khud Se Khwahish Zahir Karein Ke Hum Roza Rakhna Chahte Hain, To Unhein Roza Rakh Lene Dena Chahiye...

🍀 Bil-Khusoos Jab Bachchon Ki Umr 7 Saal Ho Jaaye, To Pyar O Mohabbat Ke Saath Ijazat De Deni Chahiye...

☘️ Iski Wajah Ye Hai Ke 7 Saal Ke Baad Bachche Thode Samajhdaar Ho Jaate Hain. Aur Rasoolullah ﷺ Ka Bhi Hukm Hai Ke 7 Saal Ki Umr Ke Baad Bachchon Ko Namaz Ki Taleem Di Jaaye, Aur Pyar O Mohabbat Ke Saath Musalle Par Laaya Jaaye...

🍀 Is Liye Ke 7 Saal Woh Umr Hai Jahan Bachcha Samajh Sakta Hai Ke 

Roza Kehte Kise Hain,

Bhookh Aur Pyaas Kya Hoti Hai..Aur Namaz Kya Hoti Hai...

☘️ Isi Umr Mein Hum Unhein Ye Sab Baatein Aaraam Se Samjhaa Sakte Hain...

🍀 To Natija Ye Hua Ke 7 Saal Ke Baad Bachchon Ko Pyar O Mohabbat Se Roza Aur Namaz Ki Aadat Dalwani Chahiye...

☘️ Aur Jo Bachche 10 Saal Se Zyaada Umr Ke Ho Jaayein, Unhein Phir Samjha Bujha Kar Roza Rakhwaya Jaaye, Kyun Ke Is Umr Ke Qareeb Baligh Hone Ka Imkaan Hota Hai.

Continue…

Ubaid-E-Raza Official

Ramazan Course (Part-35)

🪸 Baligh Hone Ka Mas’ala (Ladki Aur Ladke):

Waise To Ladkiyan 9 Saal Se Le Kar 15 Saal Ki Umr Ke Darmiyan Kabhi Bhi Baligh Ho Sakti Hain. Ye Har Bachchi Ka Alag Alag Mu‘aamla Hota Hai...

Isi Tarah Ladke 12 Saal Se Le Kar 15 Saal Ke Darmiyan Kabhi Bhi Baligh Ho Sakte Hain...

🍁 Baligh Ka Matlab Hota Hai Bada Hona...

Yaani Bachpan Se Nikal Kar Zimmedaari Ke Daur Mein Dakhil Hona.. Bachchon Ka Jo Bachpan Se Badon Ki Taraf Transaction Hota Hai, Usi Ko Baligh Hona Kehte Hain...

🪸 Jab Koi Baligh Ho Jaata / Jaati Hai, To Us Waqt Se:

🌾 Namaz Farz Ho Jaati Hai...

🌾 Roze Farz Ho Jaate Hain..

🌾 Aur Agar Maal Wagairah Maujood Ho To Zakat, Qurbani, Hajj Wagairah Bhi Wajib / Farz Ho Sakte Hain....

🍁 Ladki Baligh Kab Hoti Hai?

Ladki 9 Se 15 Saal Ke Darmiyan Kabhi Bhi Baligh Ho Sakti Hai.

Jaise:

🌾 Agar 10 Saal Ki Umr Mein Haiz (Periods) Aa Gaye, To Usi Waqt Se Baligh Maan Li Jaayegi, Aur Namaz, Roze Wagairah Farz Ho Jaayenge.

🌾 Agar 11 Saal Mein Aaye, To 11 Saal Se..

🌾 Isi Tarah Ye Silsila Chalta Rahega...

🪸 Agar Koi Bachchi Aisi Ho Ke 15 Saal Ki Umar Tak Bhi Haiz Na Aaye, To Jaise Hi Wo 15 Saal Complete Kar Legi, Usi Waqt Se Usko Baligh Maan Liya Jaayega.

Yaani Maximum Hadd 15 Saal Hai...

🌾 Agar 15 Saal Se Pehle Haiz Aa Jaaye, To Usi Waqt Baligh...

🌾 Aur Agar Haiz Na Aaye, To Arabic Date (Qamari Hisaab) Ke Mutabiq Jaise Hi Bachchi 15 Saal Ki Ho Jaaye, To Shar‘an Baligh Samjhi Jaayegi...

Continue…

Ubaid-E-Raza Official

Ramazan Course (Part-36)

🤔 Ladka Baalig Kab Hota Hai?

🌷 Ladkon Ke Liye Baligh Hone Ka Muamla Yeh Hota Hai Ke 12 Se 15 Saal Ke Darmiyan Kabhi Bhi Agar Unko Ehtelaam Ho Jaaye To Woh Baalig Ho Jaate Hain...

💐 Agar 13, 14 Ya 15 Saal Ki Umr Tak Ladke Ko Ehtelaam Nahin Hota, To Jab 15 Saal Poore Ho Jaayen, To Shar‘an Usay Baalig Maana Jaata Hai. Is Ke Baad Namaz, Roza Waghairah Farz Ho Jaate Hain...

🌷 Ehtelaam Kya Hota Hai?

Ehtelaam Ka Matlab Yeh Hai Ke Ladkon Ko Aam Taur Par Kuch Khwaab Aate Hain, Jin Ke Baad Unke Private Area Se Maadda-E-Mani Kharij Hota Hai, Yaani Safed Rang Ki Rutubat (White Discharge) Nikalti Hai. Isi Wajah Se Ladka Balig Shumar Hota Hai...

💐 Is Liye Bachchon Ko Simple Aur Samajhne Ke Andaaz Mein Pehle Se Hi Bata Kar Rakhna Chahiye Ke:

“Yeh Ek Umar Hoti Hai, Agar Kabhi Aisa Ho Jaaye Ke Aap Neend Se Bedaar Hon Aur Aapke Private Area Se Koi Rutubat Nikalti Hui Nazar Aaye, Ya Safed Discharge Wagairah Dikhe, To Aap Usi Waqt Se Baalig Ho Jaate Hain. Yeh Rutubat Napaak Hoti Hai, Aur Is Ke Baad Aap Par Ghusl Farz Ho Jaata Hai.”

🌷 Is Tarah Se Bachchon Ko Pehle Hi Awareness De Kar Rakhni Chahiye...

💐 Jab Bachcha Baalig Ho Jaata Hai, To Us Par Roza Farz Ho Jaata Hai. Aur Agar Koi Baalig Bachcha Kisi Wajah Se Roza Todh Deta Hai, To Phir Us Par Tamam Sharayi Qawa‘id Apply Ho Jaate Hain...

🌷 To Yeh Maine Wazeh Kar Diya Ke Bulughat Kab Hoti Hai Aur Roza Wagairah Kab Farz Hota Hai..

Continue…

Ubaid-E-Raza Official

Ramazan Course (Part-37)

🌹 Ab Hum Roze Ke Un Masail Ki Taraf Aate Hain Jin Ki Wajah Se Roza Toot Jaata Hai, Kin Cheezon Se Roza Toot-ta Hai Aur Kin Se Nahi Toot-ta, Roze Mein Kya Kar Sakte Hain Aur Kya Nahin Kar Sakte. Agar Roza Toot Jaaye To Sirf Qaza Hogi Ya Kaffara Bhi Dena Hoga, Kaffara Kya Hota Hai, Aur Kin Cheezon Se Roza Makrooh Ho Jata Hai... In Tamaam Masail Ko Hum Ek Ek Kar Ke Next Posts Mein Cover Karenge...

🪸 Ek Bande Ko Roza Rakhne Ki Halat Mein Kya Hukm Diya Gaya Hai?

Yeh Ke Woh Roze Ke Dauran Khaane, Peene Aur Jismani Ta’alluq Qayim Karne Se Bache. Yeh Teen Cheezein Roze Ka Main Essence Hain...

🌹 Jo Waqt Muqarrar Kiya Gaya Hai, Yaani Subh-E-Sadiq Se Le Kar Guroob-E-Aaftaab Tak, Is Dauran In Teen Cheezon Se Bachna Zaroori Hai. Agar Yeh Teen Cheezen Bande Se Ho Jaayein, Chahe Ghalti Se (Khata’an) Ya Jaan-Boojhkar, Donon Sooraton Mein Roza Toot Jaata Hai..

🪸 Dekhiye, Yahan Teen Qism Ke Muamlaat Hote Hain...

☘️ Ek Yeh Hota Hai Ke Banda Koi Kaam Jaan Boojhkar Karta Hai. Jaise Roze Mein Kisi Ne Jaan Boojhkar Khaa Liya Ya Pee Liya, Use Yaad Bhi Hai Ke Roza Hai, Maloom Bhi Hai Ke Roze Mein Khana Peena Aur Jismani Ta’alluq Qayim Karna Mana Hai, Phir Bhi Us Ne Khaa Pee Liya. Toh Is Soorat Mein Roza Toot Jaata Hai.Yeh Hota Hai Jaan-Boojhkar Khana Peena.

Continue…

Ubaid-E-Raza Official

Ramazan Course (Part-38)

🌸 Doosra Point Yeh Hai Ke Kabhi Kabhaar Galti Se Koi Cheez Munh Ke Andar Chali Jaati Hai, Ya Naak Mein Chali Jaati Hai. By Mistake Aisa Muamla Ho Jaata Hai. Halaanke Rozedaar Hona Yaad Hota Hai, Phir Bhi Ghalti Se Koi Aisa Kaam Ho Jaata Hai Joh Roze Ke Khilaaf Hota Hai. Is Soorat Mein Bhi Yeh Yaad Rakhen Ke Roza Toot Jaata Hai.

🍁 Haan, Agar Is Mein Bande Ki Be-Ehtiyaati Nahin Thi To Banda Gunahgaar Nahin Hota.

🌸 Misal Ke Taur Par:

Kabhi Kabhaar Ramazan Mein Wuzu Karte Waqt Yeh Yaad Hota Hai Ke Main Rozedaar Hoon. Maloom Bhi Hota Hai Ke Rozedaar Gargara Nahi Kar Sakta, Sirf Kulli Karne Ka Hukm Hai. Isi Tarah Naak Mein Paani Chadhaate Waqt Sirf Naak Ki Narm Haddi Tak Paani Chadhaya Jaata Hai. Agar Us Se Upar, Jahan Sakht Haddi Hoti Hai, Paani Chala Jaaye To Roza Toot Jaata Hai..

🍁 Yeh Mas’ala Maloom Bhi Hota Hai, Yaad Bhi Hota Hai Ke Main Rozedaar Hoon, Lekin Paani Kheenchte Waqt By Mistake Aisa Ho Gaya Ke Paani Dimagh Tak Chadh Gaya. Ab Yeh Ghalti Se Hua, Lekin Kyun Ke Usko Yaad Tha Ke Main Rozedaar Hoon, Is Liye Roza Toot Jaayega..

🌸 Hum Yeh Kahenge Ke Yeh By Mistake Khana Peena Ke Hukm Mein Aaya, Lekin Is Ke Bawajood Roza Toot Jaata Hai..

🍁 Jo Banda Jaan Boojhkar Aisa Kaam Karta Hai, Woh Yaqeenan Gunahgaar Hota Hai. Aur Agar Galti Se Ho Jaaye, Toh Kyun Ke Yeh Galti Hai.. إن شاء الله عزوجل Is Par Uski Koi Pakad Nahin Hogi.

Continue…

Ubaid-E-Raza Official

Ramazan Course (Part-39)

💐 Aur Teesri Condition Woh Hoti Hai Jab Bande Ko Yaad Hi Na Ho Ke Main Rozedaar Hoon. Bahut Baar Aisa Hota Hai Ke Saal Bhar Roza Nahin Rakha Hota, Phir Ramazan Ka Mahina Aata Hai. Neendh Se Uth Kar Yaad Nahin Rehta, Kuch Khaa Liya Ya Pee Liya, Is Tarah Ka Muamla Ho Jaata Hai..

☘️ Agar Kisi Ko Bilkul Yaad Hi Nahin Tha Ke Main Rozedaar Hoon, Aur Us Ne Khaa Pee Liya.. Hatta Ke Yaad Na Hone Ki Surat Mein Jismani Ta’alluq Bhi Qayim Kar Liya... Toh Is Soorat Mein Bhi Roza Nahi Toot-Ta..

💐 Yahan Par Farq Samajh Lijiye:

Post Part-38 Mein Jo Doosra Point Bataya Gaya Tha, Aur Yahan Teesre Point Mein Yeh Farq Hai Ke Agar Galti Se Khaa Pee Liya Hai Lekin Rozedaar Hona Yaad Tha, To Roza Toot Jaata Hai. Aur Agar Bilkul Yaad Hi Nahin Tha Ke Roza Hai, To Phir Roza Nahi Toot-ta...

☘️ Haan, Yeh Zaroor Hai Ke Agar Rozedaar Hona Yaad Hi Nahin Tha Aur Kuch Khaa Pee Liya, Aur Khaate Peete Hue Achanak Yaad Aa Gaya.. Ya Kisi Ne Yaad Dila Diya Ke Aap Ka Roza Hai, Aap Kya Khaa Rahe Hain.. Toh Ab Is Ke Baad Aage Khaana Jaari Rakhna Jaaiz Nahin...

💐 Ab Yeh Kehna Ke “Chalo Jo Munh Mein Hai Woh Ek Niwala Hai, Khaa Hi Lete Hain” — Aisa Hargiz Nahin Kar Sakte. Jaise Hi Yaad Aaye, Fauran Use Thook Dena Hai Aur Kulli Wagairah Kar Leni Hai, Taake Yaad Aane Ke Baad Koi Cheez Halaq Ke Neeche Na Jaa Sake...

☘️ Yaad Aane Ke Baad Agar Phir Khana, Peena, Ya Khane-Peene Ke Hukm Mein Aane Wali Cheezen.. Jaise Dawai Wagairah.. Daal Di Gayin, Ya Jismani Ta’alluq Qayim Kiya Gaya, To Roza Toot Jaata Hai...

💐 Bunyadi Baat Yahi Hai Ke Munh Ke Raaste Koi Cheez Pait Mein Chali Jaaye, Ya Khane-Peene Ke Hukm Wali Koi Cheez Ho, Ya Jismani Ta’alluq Qayim Ho ..Yeh Sab Cheezen Roze Ko Todh Deti Hain.

Continue…

Ubaid-E-Raza Official

Ramazan Course (Part-40)

🌾 Roza Todhna Kab Jaayiz Hota Hai?

Ab Sab Se Pehle Yeh Samajh Lein Ke Roza Todhna Kab Jaayiz Hota Hai, Kyun Ke Aage Joh Masail Aane Wale Hain Woh Isi Se Related Hain. Is Liye Pehle Yeh Discuss Kar Lete Hain Ke Kin Sooraton Mein Roza Todha Jaa Sakta Hai...

🌺 Ek Soorat Yeh Hoti Hai Ke Banda Roza Rakh Chuka Hota Hai, Lekin Roze Ke Dauran Koi Aisa Mas’ala Pesh Aa Jaata Hai Jis Ki Wajah Se Woh Apna Roza Mukammal Nahin Kar Paata, Aur Use Sakht Takleef Ho Rahi Hoti Hai. Ab Sawal Yeh Hai Ke Woh Kaunsi Takleefein (Sooratein) Hain Jin Ki Wajah Se Roza Todhna Jaayiz Ho Jaata Hai?

🌾 Yaad Rakhein:

① Agar Roze Ke Dauran Achanak Koi Aisi Bimaari Ho Jaaye, Ya Koi Accident Pesh Aa Jaaye Jo Bardasht Ke Qaabil Na Ho, Toh Is Soorat Mein Roza Todhna Jaaiz Hota Hai.

☘️ Misal Ke Taur Par:

🥀 Kabhi Kabhaar Achanak Itna Shadeed Pet Dard Shuruaat Ho Jaata Hai Ke Banda Bilkul Control Mein Nahin Rehta, Aur Dawayi Lena Zaroori Ho Jaata Hai...

🥀 Kabhi Sar Ka Dard Is Qadr Tez Hota Hai Ke Banda Aapa Kho Baithta Hai Aur Bardasht Nahin Kar Paata...

🥀 Kabhi Raaste Mein Chalte Hue Accident Ho Jaata Hai, Aur Ab Jaan Ka Muamla Ho, Ya Bimaari Ke Aur Badhne Ka Andesha Ho, Aur Fauran Dawayi Dena Zaroori Ho..

🎍 In Tamaam Sooraton Mein Roza Todhne Ki Ijazat Hoti Hai.

⚠️ Haan, Agar Muamlaat Mamooli (Chhota) Ho, Toh Roza Todhne Ki Ijazat Nahin Hoti.

Yani Sirf:

🥀 Halka Sa Bukhaar Aa Gaya Aur Roza Todh Diya.

🥀 Thoda Sa Sar Dard Hua Aur Roza Todh Diya.

🥀 Thodi Si Kamzori Mehsoos Hui Aur Roza Todh Diya...معاذ الله عزوجل, Yeh Jaayiz Nahin Hota...

🌺 Is Tarah Ramazan Ka Roza Todh Dene Mein Qaza Toh Laazim Hoti Hi Hoti Hai, Aur Baaz Sooraton Mein Kaffara Bhi Laazim Ho Sakta Hai. Is Liye Sirf Valid Aur Saheeh Reason Hone Par Hi Roza Todhna Jaayiz Hai..

🌾 Is Silsile Mein Yeh Bhi Yaad Rakhein Ke Agar Bimaari Ya Koi Aur Takleef Aisi Ho Jise Control Kiya Jaa Sakta Ho, Toh Koshish Karein Ke Bardasht Kar Lein Aur Iftari Ke Baad Dawayi Wagairah Lene Ka Ehtimaam Karein...

🌺 Lekin Agar Yeh Possible Na Ho, Ya Bimaari Badh Jaane Ka Andesha Ho, Ya Takleef Bahut Zyaada Ho, Toh Phir Roza Todh Sakte Hain.

Continue…

Ubaid-E-Raza Official

Ramazan Course (Part-41)

💐 Roza Todna Kab Jaiz Hota Hai?

② Roze Ki Haalat Mein Agar Bahut Zyaada Pyaas Lag Jaaye..Kabhi Kabhaar Kisi Ko Itni Zyaada Pyaas Lag Jaati Hai Ke Bardasht Karna Mumkin Nahi Rehta. Aadmi Thandi Jagah Par Baith Jaata Hai, Sar Par Paani Daal Leta Hai, Aur Mukhtalif Tareeqon Se Koshish Karta Hai Ke Roza Jaari Rakh Sake, Lekin Phir Bhi Pyaas Ki Shiddat Kam Nahin Hoti. Agar Aisi Surat Paida Ho Jaaye Ke Jaan Ya Sehat Ko Nuqsaan Ka Andesha Ho Aur Pyaas Bilkul Bardasht Ke Qaabil Na Rahe, Toh Is Haalat Mein Roza Todne Ki Ijazat Ho Sakti Hai...

🪷 ③ Teesri Surat:

Jaise Kabhi Kabhaar Haamila (Pregnant) Aurat Ho Ya Doodh Pilaane Wali (Breastfeeding) Aurat Ho. Agar Inko Roza Rakhne Se Apni Ya Bachche Ki Sehat Par Nuqsaan Ka Khatra Ho, To Inke Liye Bhi Roza Na Rakhne Ki Rukhsat Ho Sakti Hai...

Continue…

Ubaid-E-Raza Official

Ramazan Course (Part-42)

🪷 Hamal Mein Roza (Pregnancy & Breastfeeding)

🌷 Pehle Yeh Samajh Lena Zaroori Hai Ke Hamila (Pregnant) Auraton Par Bhi Roza Farz Hota Hai, Aur Jo Breast Feeding Mothers Hoti Hain Un Par Bhi Roza Farz Hota Hai...اَلْعِيَاذُ بِاللّٰهِ Hamare Yahan Kai Jagahon Par Yeh Ghalat Rawaiyat Paayi Jaati Hai, Jaise Hi Koi Aurat Hamila Hoti Hai To Use Na Roza Rakhne Diya Jaata Hai Aur Na Hi Namaz Padhne Di Jaati Hai. Yahan Tak Ke Namaz Se Bhi Roka Jaata Hai .. Yeh Bilkul Ghalat Baat Hai...

🪷 Yaad Rakhein:

Sirf Hamal (Pregnancy) Mein Hone Ki Wajah Se Roza Chhod Dena Jaiz Nahin Hai. Hamila Aurat Par Bhi Roza Farz Hai..

🌷 Haan, Agar Aisi Surat Ho Ke Roza Rakhne Ki Wajah Se Use Bahut Zyaada Takleef Hoti Ho, Ya Uska Pehle Ka Tajurba (Experience) Ho Ke Roza Rakhne Se Baad Mein Woh Sakht Bimar Pad Jaati Hai..Abhi Toh Roza Rakh Leti Hai Lekin Kuch Din Baad Zyaada Bimar Ho Jaati Hai .. Toh Is Tarah Ke Muamle Mein Aisi Aurat Ko Roza Chhodne Ki Ijazat Hai, Aur Baad Mein Us Roze Ki Qaza Karegi...

🪷 Lekin Agar Roza Rakhne Ki Qudrat Hai, Aur Koi Haqeeqi Nuqsaan Ya Sakht Takleef Nahin Hai, Toh Aisi Aurat Ke Liye Roza Rakhna Farz Hai..

🌷 Agar Woh Bina Wajah Roza Nahin Rakhti, To Woh Sakht Gunahgaar Hogi, Aur Roza Chhodne Par Jo Wa’eedein (Warnings) Aayi Hain, Woh Sab Us Par Sadiq Aayengi...

🪷 Is Liye Bila Wajah Rozon Ko Chhodna Nahi Chahiye...Jitni Ahmiyat Hamari Zindagi Mein Namazon Ki Hai, Utni Hi Ahmiyat Hamare Rozon Ki Bhi Hai...

Continue…

Ubaid-E-Raza Official

Ramazan Course (Part-43)

🌾 Chhote Bachchon Ko Doodh Pilane Wali Aurat Ka Roza...

Isi Tarah Jo Auratein Chhote Bachchon Ko Doodh Pilati Hain (Feeding Mothers), Unke Liye Bhi Asal Hukm Yahi Hai Ke Woh Roza Rakhein Aur Poori Koshish Karein Ke Roza Ada Ho Sake...

☘️ Is Silsile Mein Behtar Tareeqa Yeh Hai Ke Ramazan Aane Se Pehle Hi Bachchon Ko Kuch Is Tarah Ki Ghiza Ki Aadat Daal Di Jaaye Ke Agar Maa Din Mein Na Khaaye Toh Doodh Kam Ho Jaane Ki Soorat Mein Bachcha Bilkul Pareshaan Na Ho..

🌾 Jaise...

🥀 Thoda Bahut Formula Milk Ki Aadat Dalwa Di Jaaye..

🥀 Agar Bachcha Thoda Bada Hai To Khana Wagairah Khilaya Jaa Sakta Hai...

☘️ Is Tarah Dheere Dheere Bachche Ko Aadat Dalwayi Jaaye. Agar Bachcha Seekh Jaaye To Behtar Hai. Phir Ramazan Mein Maa Roza Rakhe Aur Iftari Ke Baad Feeding Wagairah Karwa De...

🌾 Lekin Sirf Feeding Ki Wajah Se Yeh Kehna Ke:

“Hum Bachchon Ko Doodh Pilate Hain, Is Liye Hum Roza Nahin Rakh Sakte”...Yeh Bilkul Ghalat Baat Hai. Is Surat Mein Auratein Gunahgaar Hongi...

☘️ Bahut Si Auratein Aisi Hoti Hain Jo Feeding Bhi Karwati Hain Aur Roza Bhi Rakhti Hain...Yeh Bilkul Theek Hai...Kuch Auratein Formula Milk Ya Ghiza De Kar Roza Rakhti Hain .. Yeh Bhi Saheeh Hai. Is Tarah Hi Hona Chahiye...

🌾 Haan, Agar Bil-Farz Aisi Soorat Ho Ke:

🥀 Bachcha Maa Ke Doodh Ke Siwa Kuch Bhi Accept Hi Nahi Karta..

🥀 Ya Kisi Muslim Doctor Ki Taraf Se Yeh Mashwara Mila Ho Ke Bachche Ko Aur Kuch Dena Mumkin Nahin, Aur Bachche Ki Jaan Ko Khatra Hai...

☘️ To Aise Muamlaat Mein Pehle Maa Ko Yeh Kaha Jaayega Ke Woh Koshish Kare:

🥀 Kya Bachche Ko Doodh Pila Kar Saath Saath Roza Bhi Rakh Sakti Hai Ya Nahin?...

🌾 Agar Maa Roza Rakhne Ki Wajah Se Doodh Nahin Utaar Paa Rahi, Ya Bachche Ko Shadeed Zaroorat Hai, To Is Soorat Mein Ijazat Hogi Ke Maa Roza Chhod De, Aur Baad Mein Un Rozon Ki Qaza Kare...

☘️ Warna Asal Qanoon Yahi Hai Ke Auraton Par Namaz Aur Roza Donon Lazim Hain, Aur Bila Wajah Inhein Chhodna Jaiz Nahin...

Continue…

Ubaid-E-Raza Official

Ramazan Course (Part-44)

🌹 Hamal Mein Namaz (Pregnancy Mein Namaz Ka Hukm)..

Aksar Dekha Jaata Hai Ke Kuch Auratein Pregnancy Ki Haalat Mein Namaz Bhi Chhod Deti Hain, Yeh Keh Kar Ke “Mujhse Nahin Ho Paa Raha”, Ya Phir Kursi Par Namaz Padhne Lagti Hain Bina Majboori Ke..

🌺 Yaad Rakhein: Hamila (Pregnant) Aurat Ke Liye Namaz Ka Bhi Wahi Hukm Hai Jo Baaqi Logon Ke Liye Hai...

🌹 Hamila Aurat Ko Chahiye Ke Jitni Der Tak Zameen Par Sajda Karke Namaz Padh Sakti Hai, Woh Zameen Par Hi Sajda Karke Namaz Padhe..

🌺 Agar Seedha Zameen Par Sajda Karna Mushkil Ho, To Zameen Par Koi Sakht Cheez Rakh Le Jiski Oonchaai (Height) Takriban 12 Ungli Ke Barabar Ho...

🌹 12 Ungli Ka Matlab Yeh Hai Ke 4 Ungli Is Tarah Pakad Kar, Phir 4, Phir 4 .. Kul Milakar 12 Ungli. Aisi Koi Cheez Rakh Kar Us Par Sajda Kare...

🌺 Agar Is Tarah Bhi Mumkin Na Ho, Jaise Ke:

🥀 Back Pain Ka Masla Ho..

🥀 Ya Koi Aur Shadeed Takleef Ho...

🌹 Toh Phir Majboori Ki Haalat Mein Kursi Par Namaz Padhne Ki Ijazat Hogi...

Lekin Ek Baat Yaad Rakhein: Namaz Har Haal Mein Padhni Hi Hai. Yeh Kehna Ke “Namaz Hi Nahi Padhni” ...Bilkul Jaiz Nahin....

🌺 Haan, Roze Ke Muamle Mein Agar Pregnancy Ki Wajah Se Tabiyat Kharab Hone Ka Zyaada Andesha Ho, Toh Wahan Rukhsat Hai Ke Roza Chhod Diya Jaaye Aur Baad Mein Qaza Ki Jaaye.

Continue…

Ubaid-E-Raza Official

Ramazan Course (Part-45)

🪸 Bimaar Ka Roza 

Isi Tarah Joh Log Bahut Zyaada Bimaar Hote Hain, Unke Liye Bhi Shariat Mein Rukhsat Hai. Kyunki Allah Ta‘ala Ne Kisi Bhi Jaan Par Uski Bardasht Se Zyaada Koi Hukm Lazim Nahin Kiya...

🍀 Jaise Hamila Aurat Aur Breast-Feeding Women Ke Silsile Mein Bayan Kiya Gaya .. Jab Tak Bardasht Ho, Roza Rakhne Ki Koshish Ki Jaaye...Lekin Jab Bardasht Mumkin Na Rahe, Toh Wahan Ruksat Hai Ki Roza Chhod Diya Jaaye Aur Baad Nein Iski Qaza Ki Jaaye..

🪸 Ab Sawal Yeh Hai Ki, Kis Soorat Mein Roza Chhoda Jaa Sakta Hai?

🍀 (1)..Yeh Soorat Ho Sakti Hai Ke Use Doctor Ne Mashwara Diya Ho Ke..

“Aap Roza Na Rakhein,Roza Rakhne Se Aapko Zyaada Nuqsaan Ya Takleef Ho Sakti Hai.”

🪸 Lekin Yahan Ek Baat Yaad Rakhna Zaroori Hai..

Har Doctor Ki Baat Maani Jaane Wali Nahin Hoti Ulama-E-Kiram Ne Wazeh Taur Par Farmaya Hai Ke Aisa Doctor Joh Muslim Ho Aur Parhezgaar Qism Ka Ho, Uski Baat Maani Jaayegi...

🍀 Agar Koi Gair-Muslim Doctor Sirf Andaze Se Keh De Ke “Roza Chhod Do”,

Ya Koi Naam Ke Musalman Doctor Ho Jismein Deen-Daari Aur Ehtiyaat Na Ho, Toh Unki Baat Par Roza Chhodna Durust Nahin.

🪸 Haan, Agar Koi Achha, Parhezgaar Muslim Doctor Yeh Kahe Ke,

“Aap Roza Rakhenge To Aapko Takleef Hogi Ya Bimari Badh Sakti Hai,”

To Uski Baat Maante Hue Roza Chhodne Ki Ijazat Hogi..Aur Baad Mein Un Rozon Ki Qaza Karni Hogi..

🍀 Yeh Ek Soorat Hai Jismein Bimaar Shakhs Ke Liye Roza Chhodna Jaiz Hota Hai.

Continue…

Ubaid-E-Raza Official

Ramazan Course (Part-46)

🌸 Bimaar Ka Roza

(2) Doosri Soorat:

Kabhi Kabhaar Aisa Hota Hai Ke Banda Apni Body Ki Haalat Dekh Kar Khud Mehsoos Karta Hai Ke Ab Mere Liye Roza Rakhna Mumkin Nahin. Symptoms Dekh Kar Dil Mein Galib Gumaan Paida Ho Jaata Hai, Balki Ek Qism Ka Yaqeen Sa Ho Jaata Hai Ke Agar Main Roza Rakhunga To Bahut Zyaada Bimar Pad Jaunga...Is Tarah Ke Muamle Mein Bhi Roza Chhodne Ki Ijazat Hoti Hai...

🌹 (3) Teesri Soorat:

Agar Zindagi Mein Pehle Kabhi Aisa Tajurba Ho Chuka Ho Ke Isi Bimari Ke Saath Roza Rakha Tha Aur Us Se Bahut Zyaada Bimari Badh Gayi Thi, Ya Recover Hone Mein Bahut Waqt Lag Gaya Tha, Ya Roza Bilkul Bardasht Nahin Ho Paa Raha Tha...

Toh Aise Pichhle Tajurbe (Previous Experience) Ki Bina Par Banda Ab Dobara Us Bimari Mein Roza Chhod Sakta Hai..

🌸 Misal Ke Taur Par:

Ek Aurat Thi Jise Pehli Pregnancy Mein Yeh Tajurba Ho Chuka Tha Ke Woh Roza Nahin Rakh Paa Rahi Thi, Behosh Si Ho Jaati Thi, Jism Mein Bilkul Taqat Nahin Rehti Thi..

🌹 Ab Doosri Pregnancy Mein Bhi Waise Hi Symptoms Nazar Aa Rahe Hain, Toh Woh Yeh Keh Sakti Hai Ke Pehli Pregnancy Ke Tajurbe Ki Bina Par Mujhe Ab Bhi Wahi Halat Mehsoos Ho Rahi Hai, Is Liye Ab Main Roza Nahin Rakh Paungi.. Yeh Bhi Durust Hai...

🌸 Toh Yeh Teen Sooratein Ho Gayi Jin Mein Agar Koi Shakhs Bimaar Ho, Toh In Par Ghaur Karte Hue Roza Chhodne Ki Ijazat Hoti Hai.

Continue…

Ubaid-E-Raza Official

Ramazan Course (Part-47)

Bimaar Ka Roza

⚠️ Maine Yeh Kaha Ke Roza 3 Sooraton Mein Chhoda Jaa Sakta Hai, Toh Is Ka Matlab Yeh Hai Ke Jo Shakhs Bimaar Hai, Jab Woh Bimari Se Theek Ho Jaaye, Toh Us Par Baad Mein Un Rozon Ki Qaza Lazim Hogi..Yeh Kehna Bilkul Ghalat Hai Ke:

“Roza Allah Ta‘ala Ne Mujh Par Se Muaaf Kar Diya, Is Liye Main Rakh Hi Nahi Raha.”

🪷 Roza Kisi Wajah Se Chhoda Gaya Ho..Jab Shariat Ne Baad Mein Qaza Ka Hukm Diya Hai, To Baad Mein Qaza Karni Hi Padegi...

🌹 Isi Tarah Yeh Bhi Nahin Kaha Jaa Sakta Ke:

“Main Rozon Ka Fidiya De Deta Hoon.”

Kyun Ke Fidiya Aakhri Soorat Mein Hota Hai...

🪷 Shariat Ka Tareeqa Yeh Hai Ke:

🥀  Pehle Koshish Ki Jaye Ke Roza Ada Ho Jaye

🥀  Agar Ada Nahin Ho Paa Raha, To Qaza Ki Jaaye

🥀  Aur Agar Qaza Bhi Mumkin Na Ho, Tab Fidiye Ka Hukm Hota Hai..

🌹 Kuch Log Bina Poori Koshish Ke Yun Hi Fidiya De Dete Hain Aur Keh Dete Hain Ke:

“Roza Hum Se Nahin Ho Paa Raha.”

Yeh Durust Tareeqa Nahin.

Is Liye Koshish Karni Chahiye, Jab Tak Shariat Ki Taraf Se Aakhri Majboori Saabit Na Ho Jaaye...

Continue…

Ubaid-E-Raza Official

Ramazan Course (Part-48)

🌸 Bimaar Ka Roza

Agar Koi Shakhs Bahut Zyada Bimaar Hai, Lekin Use Yeh Maloom Hai Ke Is Bimari Se Theek Ho Jayega Aur Baad Mein Roza Rakh Sakta Hai, Toh Phir Us Par Yahi Hukm Hai Ke Baad Mein Un Rozon Ki Qaza Kare..

🌷 Kuch Log Garmiyon Mein Roza Nahin Rakh Paate, Lekin Sardiyon Mein Rakh Sakte Hain. To Agar Ramazan Garmiyon Ke Dinon Mein Aa Raha Ho Aur Us Waqt Roza Rakhna Mushkil Ho, To Us Waqt Roza Na Rakhen, Balki Baad Mein Sardiyon Mein Un Rozon Ki Qaza Kar Len.

🌸 Isi Tarah Kuch Log Sardiyon Mein Roza Nahin Rakh Paate, Lekin Garmiyon Mein Rakh Sakte Hain, To Woh Garmiyon Mein Apni Qaza Poori Kar Len..

🌷 Is Ki Misaal Arthritis Ke Patients Ki Hai. Aksar Arthritis Ke Mareezon Ko Sardiyon Mein Jism Mein Bahut Zyaada Dard Hota Hai, Jis Ki Wajah Se Woh Roza Nahin Rakh Paate, Lekin Garmiyon Mein Un Ke Liye Roza Mumkin Hota Hai. To Aise Log Garmiyon Mein Apne Roze Poore Kar Sakte Hain...

🌸 Aur Agar Kisi Ko Yeh Ummeed Ho Ke Woh 2–3 Saal Ke Baad Theek Ho Jayega, To Phir Baad Mein Roza Rakhna Lazim Hoga.

Is Silsile Mein Poori Koshish Karni Chahiye...

🌷 Lekin Agar Koi Bimari Aisi Ho Ke Jis Mein Theek Hone Ke Chances Bahut Kam Hon... Jaise Ke Baaz Cancer Patients Ke Saath Hota Hai... Ya Koi Aur Aisa Muamla Ho Ke Bahut Zyaada Kamzori Aa Chuki Ho Aur Aisa Lagta Ho Ke Isi Halat Mein Inteqal Ho Jayega, Aur Aainda Sehat Theek Hone Ki Koi Ummeed Na Ho, To Aisi Soorat Mein Fidiya Dene Ki Ijazat Hoti Hai.

Continue…

Ubaid-E-Raza Official

Ramazan Course (Part-49)

🌹 Bimaar Ka Roza:

Aur Yeh Baat Bhi Yaad Rakhein Ki Agar Khuda Na Khwasta Aisi Bimari Lag Gayi Thi Ke Uske Theek Hone Ki Ummeed Hi Nahin Thi, Aur Is Buniyaad Par Fidiya Wagairah De Diye Gaye The, Lekin Allah Ta‘ala Ka Karam Hua Ke Kuch Saalon Baad Woh Shakhs Bilkul Tandurust Ho Gaya, Toh Ab Jo Fidiya Pehle Diya Gaya Tha Woh Nafl Sadqa Shumar Hoga.

Aur Jo Roze Chhoot Gaye The, Un Sab Rozon Ki Qaza Karni Lazim Hogi. Fidya Dene Ke Bawajood Qaza Saqit Nahin Hoti.

Is Liye Mareez (Patient) In Hi Sharaait Ke Saath Roza Chhod Sakta Hai...

🪷 Buzurg Hazraat Ka Roza:

Isi Tarah Jo Log Bahut Zyaada Budhe Ho Chuke Hon, Budhape Ke Aakhri Marhale Mein Hon, Aur Un Mein Roza Rakhne Ki Bilkul Taqat Na Ho, Toh Aise Buzurg Hazraat Ki Taraf Se Bhi Fidiya Diya Jaa Sakta Hai...Is Qism Ke Buzurgon Ko Shaikh-E-Faani Kaha Jaata Hai. Aise Buzurg Hazraat Roza Chhod Sakte Hain Aur Unki Taraf Se Fidya Ada Kiya Jayega...

🌹 Isi Tarah Jo Musafir Hota Hai, Woh Bhi Rozon Ko Chhod Sakta Hai. Musafir Ke Ahkaam إن شاء الله عزوجل  Aage Aayenge, Jahan Main Aap Ko Tafseel Ke Saath Bayan Hoga..Mareez Aur Musafir Donon Ko Roza Chhodne Ki Rukhsat Hai. Qur’an-E-Majeed Mein Khud Allah Ta‘Ala Ne Irshad Farmaya Hai Ke Mareez Aur Musafir Baad Mein Apne Chhoote Hue Roze Poore (Qaza) Kar Sakte Hain...

Ab Next: Kaffare Ka Mas’ala…

Continue…

Ubaid-E-Raza Official

Ramazan Course (Part-50)

💐 Kaffare Ka Mas’ala:

Agar Khuda Na Khwasta Roza Toot Gaya, Aur Rozedaar Hona Yaad Tha, Phir Bhi Kisi Wajah Se Roza Toot Gaya, Ya Jaanbujhkar Kisi Ne Roza Todh Diya, Ya La-Ilmi Mein Roza Todh Diya.. Yeh Bhi Hota Hai Ke La-Ilmi Mein Banda Roza Todh Deta Hai. Mas’ala Maloom Nahin Hota, Yeh Samajh Leta Hai Ke Is Amal Se Roza Toot Chuka Hai, Aur Phir Khane-Peene Lag Jaata Hai...Is Tarah Ke Muamlaat Bhi Ho Jaate Hain...

🪸 To Agar Is Qism Ka Muamla Ho Ke Roza Todh Diya Gaya, Toh In Tamaam Sooraton Mein Qaza Karni Hoti Hai, Yeh Aap Jaante Hi Hain...Aur Bila Uzr Kisi Ne Ramazan Ka Roza Nahin Rakha, Toh Woh Sakht Gunahgaar Hai, Aur Us Par Bhi Rozon Ki Qaza Farz Hoti Hai...

💐 Toh Jab Bhi Roza Tootega, Ek Qaza To Lazim (Compulsory) Hoti Hi Hai, Lekin Kabhi Kabhaar Kuch Aise Muamlaat Bhi Paida Ho Jaate Hain Jin Ki Wajah Se Bande Par Kaffara Bhi Lazim Ho Jaata Hai...Yaani Agar Ramazan Ka Ek Roza Todh Diya, Toh Us Ki Qaza Toh Karni Hi Hai, Lekin Saath Hi Saath Agar Aisa Muamla Paaya Gaya Ke Jismein Ramazan Ka Roza Bila Wajah, Jaanbujhkar Todhna Shamil Ho...Jise Sakht Bebaaqi Aur Jur’at Kaha Jata Hai... Ke Na Allah Ka Khauf, Na Rasulullah ﷺ Ka Khauf, Aur Na Hi Shari‘at Ka Paas.. Jab Dil Chaha Roza Rakh Liya Aur Jab Dil Chaha Todh Diya .. Toh Aisi Soorat Mein Kaffara Bhi Laazim Ho Jaata Hai...

🪸 Jo Rozay Kisi Sharayi Wajah Se Todhe Jaate Hain, Un Mein Kaffara Nahin Hota...Lekin Joh Jaanbujhkar, Bina Kisi Jaiz Wajah Ke, Sirf Apni Manmaani Par Ramazan Ka Roza Todh Dete Hain, Toh Phir Un Par Kaffara Bhi Laazim Hota Hai...

Continue…

Ubaid-E-Raza Official

Ramazan Course (Part-51)

💐 Kaffare Ka Mas’ala:

Kaffara Kin Sooraton Mein Laazim Hota Hai, Us Ki Kuch Shartein Hoti Hain. Pehle Yeh Samajh Lein Ke Kaffara Hota Kya Hai?

🪷 Roze Ka Kaffara Yeh Hai Ke Banda Bila Kisi Sharayi Wajah Ke Ramazan Ka Roza Todh De...Misal Ke Taur Par..

Ek Shakhs Ne Ramazan Ka Roza Rakha. Koi Wajah Nahin Thi, Na Bimari Thi, Na Safar Ka Muamla Tha. Bas Samne Biryani Rakhi Hui Dekhi, Dil Chaha Aur Usne Biryani Kha Kar Roza Todh Diya. Yeh Sirf Apni Khwahish Par Roza Todhna Hai...Aisi Soorat Mein Us Shakhs Par Qaza Bhi Hai Aur Kaffara Bhi..

💐 Qaza Ka Matlab Yeh Hai Ke Ramazan Ke Baad Us Ek Din Ke Roze Ki Qaza Karega...Aur Kaffara Yeh Hai Ke Zindagi Mein Kabhi Bhi 60 Roze Lagataar (Musalsal) Rakhne Padenge...Chahe To Qaza Ke Saath Rakh Le, Chahe Baad Mein Alag Se Rakh Le...Is Mein Koi Harj Nahin.

Lekin Jo 60 Kaffare Ke Roze Hain, Unka Musalsal Hona Lazim Hai, Beech Mein Koi Gap Nahi Aana Chahiye...

🪷 Agar Aisa Ho Gaya Ke Kisi Ne 40 Roze Rakh Liye, Phir 41wein Din Kisi Wajah Se Roza Chhoot Gaya, To Joh Roze Rakhe Gaye Woh Nafl Shumar Honge, Aur Kaffara Phir Se Ek (1) Se Dobara Shuru Karna Padega...Is Liye Kaffare Ke 60 Roze Ek Ke Baad Ek Lagataar Rakhna Zaroori Hota Hai...

💐 Aurton Ka Muamla..

Agar Aurat Ne Kaffare Ke Roze Shuru Kiye Aur Beech Mein Haiz (Periods) Aa Gaye, Jaise 20 Roze Rakhe Aur Phir 5 Din Periods Aa Gaye, To In 5 Dinon Mein Roza Chhod Degi...Jaise Hi Periods Khatam Hon, Fauran Wahi Se Kaffare Ke Roze Continue Karegi, Yaani 26wein Roze Se.

Aurat Ke Liye Periods Sharayi Uzr Hain, Is Liye Is Se Kaffare Ka Tasalsul Nahin Toot-ta...Lekin Periods Ke Khatam Hone Ke Baad Agar Jaanbujhkar Der Ki, To Phir Gap Aa Jayega Aur Kaffara Mutasir Ho Sakta Hai...

🪷 Is Liye Kaffare Ke Rozon Mein 60 Musalsal Roze Rakhna Buniyaadi Shart Hai.

Continue…

Ubaid-E-Raza Official

Ramazan Course (Part-52) 

🌾 Kaffāre Ka Mas’ala:

Aur Agar Bil-Farz Aisa Ho Jaaye Ki Kisi Ko Maloom Hi Na Tha Ke Us Par Kaffara Lazim Ho Chuka Hai, Aur Ramazan Dar Ramazan Kaffara Lazim Hota Chala Gaya. Ab Woh Koshish To Kar Raha Hai Ke Kaffare Ke Roze Rakhe, Lekin Kisi Wajah Se Ab Ramazan Ke Kaffare Ke Roze Rakhne Par Qudrat Nahin Rahi, To Phir 60 Miskeenon Ko Do Waqt Pet Bhar Kar Khana Khilana Yeh Kaffara Hoga... 

🌹 Asal Hukm Yahi Hai Ke Pehle Roza Rakha Jaaye... Lekin Jaise Kabhi Kabhaar Aisa Hota Hai Ke Aadmi Bahut Zyada Budha Ho Jaata Hai, Ya Itni Kamzori Ho Jaati Hai Ke Kaffare Ke Roze Rakhne Ki Taqat Hi Nahin Hoti, To Aisi Soorat Mein Us Se Kaha Jayega Ke Apni Taraf Se 60 Miskeenon Ko Do Waqt Pet Bhar Kar Khana Khilaye... 

🌾 Miskeen Se Murad Sharayi Faqeer Hain.. Aise Mard Ya Auratein Jo Mustahiq E Zakat Hon..Yaani Jinhein Aap Zakat De Sakte Hain... Unhein Dhoond Kar Subah Aur Shaam Pet Bhar Kar Khaana Khilana Zaroori Hai. Yeh Nahin Ke Bas Ek Niwala De Diya Ya Roti Ka Chhota Sa Tukda De Diya.. Nahin.. Balki Theek Tarah Se Pet Bhar Kar Khilana Hoga. To Yeh Kare… Ya Phir…

Continue… 

Ubaid-e-Raza Official

Ramazan Course (Part-53)

🪷 Kaffare Ka Mas’ala:

Ya Phir, Kyun Ke 60 Miskeenon Ko Dhoondhna Aur Jin 60 Ko Subah Khilaya Unhi 60 Ko Shaam Ko Bhi Khilana Hota Hai, Is Liye Yeh Kaam Bahut Difficult Ho Jaata Hai...

🏵️ Haan, Is Mein Yeh Soorat Ho Sakti Hai Ke Aap Kisi Madarse Mein Jaayen Jahan 60 Gareeb Bachche Padh Rahe Hon. Wahan Aap Zimmedaron Se Baat Karein Ke Kaffara Dena Hai Aur 60 Miskeenon Ko Khilana Hai, To Woh Intezaam Kar Lenge. Is Tarah Jin 60 Ko Subah Khilaya Gaya, Unhi 60 Ko Shaam Ko Bhi Khilana Mumkin Ho Jaata Hai...

🪷 Ya Phir Yeh Bhi Ho Sakta Hai Ke Ek Hi Miskeen Ko Muqarrar Kar Liya Jaaye, Aur 60 Din Tak Use Subah Aur Shaam Khaana Khilaya Jaye..Yeh Bhi Jaiz Hai Aur Is Se Bhi Kaffara Ada Ho Jaata Hai..

🏵️ Yaani Ya To 60 Miskeen Ek Saath, Subah Aur Shaam Khaana Kha Lein...Ya Ek Hi Miskeen Ko 60 Din Tak Subah-Shaam Khilaya Jaye...Donon Sooraton Mein Kaffara Ada Ho Jayega.

Continue…

Ubaid-E-Raza Official

Ramazan Course (Part-54)

🏵️ Kaffare Ka Mas’ala:

Agar Khana Khilane Ka Muamla Mushkil Ho Raha Ho, To Is Mein Ek Aur Rukhsat Yeh Hai Ke 60 Sadqa-E-Fitr Ki Raqam 60 Aise Logon Ko Di Jaye Jo Zakat Lene Ke Haqdar Hote Hain (Yaani Sharayi Faqeer)..Har Ek Ko Ek Sadqa-E-Fitr Ke Barabar Raqam Di Jaaye...

🪷 Misal Ke Taur Par:

Agar Ek Sadqa-e-Fitr 100 Rupaye Hai, To Do Sooratein Hain:

🥀 Ya To 60 Miskeenon Ko Do Waqt Pet Bhar Kar Khaana Khilaya Jaaye..

🥀 Ya Phir 60 Miskeenon Ko 100–100 Rupaye Diye Jayein...

🏵️ Is Tarah Kul Raqam 6,000 Rupaye Banegi, Aur Yeh Rozon Ka Kaffara Ada Ho Jayega....

🪷 Yeh Yaad Rakhein Ke:

🥀 Do Waqt Pet Bhar Kar Khana Khilana

🥀 Ya Ek Sadqa-e-Fitr Ki Raqam Dena

👉 Dono Barabar (Equal) Hain.

Aap Chahein To Gharibon Ko, Ya Gareeb Talaba Ko Jahan Woh Deen Padh Rahe Hon, Wahan Ja Kar Bhi Kaffare Ki Raqaam De Sakte Hain...

🏵️ Ahm Baat:

Har Kisi Ko Yeh Raqam Nahin Di Jaa Sakti...

Sirf Wahi Shakhs Haqdar Hai Jo Zakat Lene Ka Mustahiq Ho (Yaani Sharayi Faqeer)۔

Agar Kisi Ghair-Mustahiq Ko De Diya Gaya, Toh Woh Nafl Sadqa To Ho Jayega, Lekin Kaffara Ada Nahin Hoga...

🪷 Kaffare Ki Sooratein (Tarteeb Ke Sath):

1️⃣ Sab Se Pehli Aur Afzal Soorat:

  🥀 60 Roze Rakhna..

2️⃣ Agar 60 Roze Rakhna Mumkin Na Ho, To:

  🥀 60 Miskeenon Ko Do Waqt Pet Bhar Kar Khaana Khilana

  🥀 Ya Ek Miskeen Ko 60 Din Tak Do Waqt Khilana..

3️⃣ Ya Phir:

  🥀 Sadqa-E-Fitr Ki Jo Raqam Banti Ho (50, 60, 100 Rupaye... Jo Muqarrar Ho)

  🥀 60 Miskeenon Ko De Di Jaye..

Isi Tarah Rozon Ka Kaffara Ada Hota Hai...

Continue…

Ubaid-e-Raza Official

Ramazan Course (Part-55)

☘️ Kaffare Ka Mas’ala:

Kaffare Ka Hukm Itna Sakht Kyun Hai?...

Baaz Logon Ko Yeh Lagta Hai Ke... “Allah Ta‘ala Ne Kaffare Ka Hukm Kitna Sakht Rakha Hai!”....

💐 Yaad Rakhein!

Agar Kisi Par Kaffāra Lazim Aa Raha Ho, To Yeh Shari‘at Ki Taraf Se Sakhti Nahin Hai...Dar-Asal Kaffara Tab Laazim Hota Hai Jab Taqriban 8 Shartein Ek Sath Paayi Jaayen..Jab Tak Woh Saari Shartein Poori Na Hon, Kaffara Laazim Nahin Hota...

☘️ Yaani Yeh Woh Khaas Aur Aakhri Soorat Hoti Hai Jahan...Banda Intehayi Darje Ka Bebaaq Hota Hai

Na Usne Kabhi Shari‘at Ka Lihaz Rakha..Na Kabhi Seekhne Ya Samajhne Ki Koshish Ki...Aise Hi Shakhs Par Jaa Kar Kaffara Laazim Hota Hai..

💐 Is Liye Har Kisi Par Kaffara Laazim Nahin Hota...Aur Agar Kisi Bande Par Kaffara Laazim Ho Raha Hai.. Toh Samajh Lena Chahiye Ke Yeh Uske Apne Amal Ka Nateeja Hai,

Jis Ki Wajah Se Woh Is Sakht Hukm Mein Phans Gaya...

Continue…

Ubaid-e-Raza Official

Ramazan Course (Part-56)

🪸 Kaffare Ka Mas’ala:

Ab Yeh Samjhein Ke Kaun-Kaun Si Conditions Paayi Jaane Par Kaffara Laazim Hota Hai?...

① Mahe-e-Ramazan Ka Ada Roza Ho..Kaffara Usi Waqt Laazim Hota Hai Jab Ramazan Ka Ada Roza

Bila Kisi Sharayi Wajah Ke Jaan-Bujh Kar Todh Diya Jaaye...

🌸 Misal Ke Taur Par:

Ramazan Ka Maheena Chal Raha Ho..Kisi Shakhs Ke Paas Koi Uzr Ya Wajah Na Ho...Phir Bhi Usne Jaan-Bujh Kar Kuch Khaa Liya Ya Pee Liya..Toh Kyun Ke Usne Ramazan Ka Ada Roza Toda Hai..Is Liye Kaffara Laazim Hoga..

🪸 Is Liye Pehli Condition Yeh Hai Ke:

👉 (Roza) Ramazan Ka Ada Roza Ho...

Is Ka Matlab Kya Hua?.. Agar

🥀 Ramazan Ka Qaza Roza Todh Diya..

🥀 Nafli Roza Todh Diya..

🥀mannat Ka Roza Todh Diya..

🥀 Kisi Kaffare Ka Roza Todh Diya...

🌸 Toh In Sooraton Mein Sirf Qaza Laazim Hoti Hai,

Kaffara Laazim Nahin Hota..Kyun Ke Yeh Ramazan Ka Ada Roza Nahin Tha...

Continue…

Ubaid-e-Raza Official

Ramazan Course (Part-57)

☘️ Kaffare Ka Mas’ala:

Baar-Baar Sawal Aate Hain Ke:

Nafli Roza Todh Diya Toh Kya Kaffara Aayega?..

Qaza Roza Todh Diya Toh Kya Kaffara Aayega?..

Yaad Rakhein!

👉 Sirf Aur Sirf Ramazan Ka Ada Roza Jaan-Bujh Kar

Bila Sharayi Wajah Todhne Par Kaffara Laazim Hota Hai...

🌷 Is Ke Alawa Koi Bhi Roza Ho...Nafl Ho, Qaza Ho, Mannati Ho Ya Kisi Kaffare Ka Roza Ho...

Agar Koi Shakhs Bila Wajah Use Todh Deta Hai Toh...Gunahgaar Toh Ho Sakta Hai..Lekin Kaffara Laazim Nahin Hota..

☘️ Yahan Se Ek Aur Aham Baat Bhi Samajh Mein Aati Hai..Agar Kisi Ne Nafli Roza Rakha, Phir Kisi Wajah Se Ya Khud Ba Khud Woh Roza Toot Gaya,

To Us Nafli Roze Ki Qaza Laazim Hoti Hai...

🌷 Kuch Log Yeh Samajhte Hain Ke:

“Nafil Tha, Chaahe Rakhein Ya Na Rakhein...Todh Diya To Koi Baat Nahin.. Qaza Bhi Zaroori Nahin” ....

Yeh Soch Ghalat Hai...

☘️ Haqeeqat Yeh Hai:

Jab Tak Nafli Roza Shuru Nahin Kiya...Woh Nafli Hi Tha...Lekin Jab Aap Ne Roza Shuru Kar Liya..Toh Ab Use Poora Karna Laazim Ho Gaya...

🌷 Warna Yeh Silsila Chal Padega Ke..Ibadat Shuru Ki Aur Be-Lihazi Ke Sath Chhod Di..Aur Yeh Tarz E Amal Allah Ta‘ala Ki Ibadat Ke Shayan-E-Shaan Nahin...Ibadat Mein Be-Dili, La-Parwahi Aur Mazak Ka Pehlu Hargiz Nahin Hona Chahiye...

Continue…

Ubaid-e-Raza Official

Ramazan Course (Part-58)

🍁 Kaffare Ka Mas’ala:

Is Liye Nafli Ibadatein Ya Toh Shuru Hi Na Ki Jaayein..Aur Agar Shuru Ki Jaa Rahi Hon To Unhein Poora Kiya Jaye..

🪻 Kuch Logon Ki Aadat Hoti Hai Ke..Unhein Pehle Se Maloom Hota Hai Ke Kal Daant Nikalwane Ya Kisi Aise Kaam Ke Liye Jaana Hai..Jismein Roza Tootne Ka Imkaan Zyaada Hota Hai...Phir Bhi Nafli Roza Rakh Lete Hain Aur Yeh Sochte Hain Ke

“Baad Mein Agar Toot Gaya To Kya Hoga”...

🍁 Yeh Rawaiyya Galat Hai..Agar Aap Ko Pehle Se Ilm Ho Ke Nafli Roze Ko Todhne Ki Naubat Aa Sakti Hai... Toh Roza Hi Na Rakhein...

🪻 Isi Tarah Kabhi Kabhaar Kisi Khatoon Ko Yeh Andaza Hota Hai Ke Haiz Aane Wale Hain Aur Aam Taur Par Isi Din Periods Aa Jaate Hain.. 

Phir Bhi Roza Rakh Liya Jaata Hai Aur Socha Jaata Hai...“Aa Gaya To Roza Toot Gaya.. Koi Masla Nahi” ...

Aisa Rawaiyya Durust Nahin...

🍁 Is Liye Jab Bhi Ibadat Shuru Ki Jaaye... Toh Use Poora Karne Ki Niyyat Ke Saath Kiya Jaaye...Agar Nafli Roza Shuru Kar Liya Aur Todh Diya Gaya

Ya Khud Ba Khud Toot Gaya (Jaise Haiz Aa Jana)

To Baad Mein Us Roze Ki Qaza Karna Laazim Hota Hai...

🪻 Bilkul Isi Tarah

Nafli Namaz Ka Bhi Hukm Hai..Agar Kisi Wajah Se Nafli Namaz Todhni Pad Jaaye...Toh Use Dobara Ada Karna Hota Hai..

Is Liye Nafli Namaz Aur Nafli Roza.. Donon Ka Hukm Ek Jaisa Hai...

🍁 Nateeja:

👉 Mahe-E-Ramazan Ka Ada Roza Jaan-Bujh Kar Todne Par

Kaffara Laazim Hota Hai..

Is Ke Alawa Baaqi Tamam Rozon Mein Kaffara Laazim Nahin Hota...

Continue…

Ubaid-E-Raza Official

Ramazan Course (Part-59)

☘️ Kaffare Ka Mas’ala

② Jaan-Boojh Kar Yeh Muamla Kiya Ho:

Roza Hona Yaad Ho Aur Jaan-Boojh Kar Is Tarah Ka Kaam Kiya Ho...Agar Galti Se Ho Gaya Ho To Kaffara Lazim Nahin Aata...

🍀 Jaise Maine Aap Ko Samjhaya Tha Ke Kabhi Kabhaar Wuzu Karte Waqt Ya Naak Mein Paani Chadhate Hue Thoda Sa Paani Gale Ke Neeche Utar Gaya, Ya Is Qism Ka Koi Aur Muamla Galti Se Ho Gaya, Toh Is Soorat Mein Bhi Kaffara Nahin Hai..Lekin Agar Jaan-Boojh Kar Kiya Ho, Toh Phir Kaffara Lazim Aayega...

☘️ ③ Bighair Kisi ‘Uzr-E-Sharayi Ke Ho (Yaani Koi Valid Sharayi Wajah Na Ho):

Shari‘at Agar Roza Todhne Ki Rukhsat Deti Hai To Phir Woh Theek Hai...Jaise..

Agar Koi Shakhs Bahut Zyaada Bimar Ho Gaya Aur Use Dawayi Khaani Padhi, Is Liye Us Ne Roza Todh Diya...Yahan Woh Jaan-Boojh Kar Hi Khaa Raha Hota Hai, Galti Se Toh Dawai Pet Mein Nahin Gayi Hoti...

🍀 Lekin Phir Bhi Yeh Theek Hai..Kyun Ke Us Ne Roza Ek Valid Sharayi Wajah Ki Bina Par Todha Hai...Aur Jo Shakhs Bila Wajah, Bighair Kisi Sharayi ‘Uzr Ke Roza Todhta Hai, Toh Us Par Kaffara Lazim Aayega.

Continue...

Ubaid-E-Raza Official

Ramazan Course (Part-60)

☘️ Kaffare Ka Mas’ala : ④

Roza Todne Ke Baad Koi Aisi Cheez Pesh Na Aaye Jo Baad Mein Roza Todhne Ya Tootne Ka Sabab Ban Jaaye...Yaani Agar Ramazan Ka Ada Roza Tha Aur Kisi Shakhs Ne Jaan Boojh Kar, Baghair Kisi Sharayi Uzr Ke Roza Todh Diya, Toh Asal Qaida Yeh Hai Ke Us Par Kaffara Lazim Hota Hai.

🍁 Lekin Agar Usi Din Baad Mein Koi Aisa Amr Pesh Aa Gaya Jis Ki Wajah Se..Ya Toh Roza Khud Ba-Khud Toot Jaata Hai,

Ya Roza Todhna Jaiz Ho Jata Hai.. Toh Is Soorat Mein Kaffara Muaaf Ho Jaata Hai...

☘️ Misal Ke Taur Par:

Ek Shakhs Ne Ramazan Ka Roza Rakha Aur 12 Baje Din Mein Baghair Kisi Wajah Ke Khaa-Pi Liya. Ab To Qaida Yeh Hai Ke Is Par Kaffara Lazim Ho...Lekin Agar Usi Din Shaam 4 Baje Woh Sakht Bimaar Padh Gaya, Jis Ki Wajah Se Us Ke Liye Roza Todhna Jaiz Ho Gaya...Ya Accident Ho Gaya Aur Hospital Mein Dakhil Karna Pada, Jahan Dawayi Dena Zaroori Ho Gaya..

To Aisi Soorat Mein Kaffara Muaaf Ho Jayega..

🍁 Isi Tarah Agar Kisi Aurat Ne Baghair Wajah Ke Roza Todh Diya, Phir Usi Din Shaam 4–5 Baje Us Ko Haiz Aa Gaya..Toh Is Soorat Mein Bhi Kaffara Muaaf Ho Jaata Hai...

☘️ Yeh Shari‘at E Mutahharah Ka Ek Azeem Ehsaan Hai Ke Agar Baad Mein Koi Aisi Cheez Pesh Aa Jaye Jis Ki Wajah Se Roza Todhna Jaiz Ho Jaata Ho, To Kaffara Lazim Nahin Rehta...

🍁 Natija:

Kaffara Lazim Hone Ke Liye Zaroori Hai Ke Roza Jaan-Boojh Kar Todhne Ke Baad Poora Din Koi Aisa Uzr Pesh Na Aaye..Jo Baad Mein Roza Todhne Ya Tootne Ka Sabab Ban Jaaye...

Continue...

Ubaid-E-Raza Official

Ramazan Course (Part-61)

💐 Kaffare Ka Mas’ala :

⑤ Roza Todhne Wala Masail Ka Janne Wala Ho, La-Ilm Na Ho.. Yaani Roza Todhne Wale Shakhs Ko Kisi Bhi Qism Ka Doubt Ya Galat Fehmi Na Ho, Balki Use Pakka Yaqeen Aur Poora Ilm Ho Ke

“Agar Main Yeh Kaam Karunga To Mera Roza Toot Jayega.”

🌻 Agar Koi Shakhs Shari‘at Ka Masla Jaane Baghair, La-Ilmi Ya Galat Samajh Ki Wajah Se Koi Aisa Kaam Kar Leta Hai,

Aur Phir Us Buniyad Par Roza Todh Deta Hai,

Toh Is Soorat Mein Kaffara Lazim Nahin Hota..

💐 Kaffara Usi Waqt Lazim Hota Hai Jab Banda

Masail Ko Jaanta Ho,

Yaqeen Ke Saath Jaanta Ho Ke Is Kaam Se Roza Toot Jaata Hai...Aur Phir Jaan-Boojh Kar Roza Todh De...

🌻 Misal Ke Taur Par:

Kuch Log Yeh Samajhte Hain Ke Aankh Mein Surma Lagane Se Roza Toot Jata Hai..Ab Kisi Ne Roza Rakha, Surma Laga Liya, Phir Yeh Soch Kar Ke “Mera To Roza Toot Gaya” Jaa Kar Khaa-Pi Liya...

Yahan Asal Mein Masla Na Samajhne Ki Wajah Se Galti Hui...Is Liye Is Par Kaffara Lazim Nahin Hota...

💐 Isi Tarah Kabhi Kabhaar Khud Ba-Khud Ulti Ho Jaati Hai..Jabke Khud Ba-Khud Hone Wali Ulti Se Roza Nahin Toot’ta.

Lekin Kuch Log Yeh Samajh Lete Hain Ke Ulti Karne Se Roza Toot Jataa Hai...Is Ghalat Fehmi Ki Buniyad Par Woh Jaan-Boojh Kar Kuch Khaa-Pi Lete Hain...

🌻 Halanke Roza Pehle Toota Hi Nahin Tha..Magar Masail Ki Samajh Mein Kami Aur La-Ilmi Ki Wajah Se..Unhon Ne Apne Haath Se Roza Todh Diya...Is Soorat Mein Bhi, Kyun Ke Unhein Yeh Masla Maloom Nahin Tha,

Kaffara Lazim Nahin Hota..

💐 Khulasa:

Kaffara Usi Waqt Lazim Hota Hai Jab Banda Masail Ka Ilm Rakhte Hue,

Bila Shak O Shuba,

Jaan-Boojh Kar Roza Todh De.

Continue..

Ubaid-E-Raza Official

Ramazan Course (Part-62)

🍁 Kaffare Ka Mas’ala :

⑥ Jo Cheez Khaayi Jaa Rahi Ho, Woh Waaqayi Khaane Wali Cheez Ho

⑦ Aur Yeh Khana-Peena Mooh Ke Zariye Ho Yaani Woh Cheez Jo Log Aam Taur Par Khaane Ke Taur Par Khaate Hain Taake Jism Ko Taqat Mile..Ya Taste (Zaiqe) Ke Liye Khaate Hain Kyunki Us Ka Zaiqa Pasand Hota Hai..

Ya Dawa Ke Taur Par Khaate-Peete Hain....Toh Aisi Koi Cheez Jaan Bujhkar Khaayi Ya Pee Jaaye To Kaffara Lazim Hota Hai...

🌷 Is Ka Matlab Yeh Hai Ke Agar Naak Ke Zariye Koi Cheez, Jaise Misal Ke Taur Par Juice Ka Koi Qatra, Daala Gaya Aur Woh Gale Tak Pahunch Gaya...Toh Is Par Kaffara Lazim Nahi Hoga..Is Liye Ke Kaffara Us Waqt Hota Hai Jab Khana Mooh Ke Zariye Aur Khaane Wali Cheez Ho...

🍁 Isi Tarah Agar Koi Cheez Taste Ke Liye Ya Dawa Ke Taur Par Mooh Se Khaayi Jaaye To Kaffara Aata Hai..Lekin Agar Naak Mein Dawa Daali Gayi Toh Roza Toot Jaayega, Magar Kaffara Lazim Nahi Hoga ..

Kyunki Dawa Ka Khana Mooh Ke Zariye Nahin Hua...

🌷 Isi Tarah Misal Ke Taur Par Agar Kisi Ne Mitti Utha Kar Khaa Li..Toh Is Se Bhi Roza Toot Jaayega..Lekin Kaffara Lazim Nahi Hoga..

Is Liye Ke Mitti Na Toh Maze Ke Liye Khaayi Jaati Hai..Na Pate Bharne Ke Liye..Na Is Se Jism Ko Koi Taqat Hasil Hoti Hai.. Lihaza Mitti Khaane Se Roza To Toot Jaata Hai,

Magar Kaffara Wajib Nahin Hota..

Continue…

Ubaid-e-Raza Official

Ramazan Course (Part-63) 

🌻Kaffare Ka Mas’ala :

⑧ Us Ne Roza Ki Niyat Raat Ke Waqt Kar Li Ho.. 

Yaani Sehri Ke Waqt Us Ki Niyat Haazir Ho. Ramazan Ke Roze Mein Aam Taur Par Sehri Karna Hi Niyat Ke Qayim Hone Ki Daleel Hota Hai... 

💐Itni Saari (Upar Bayan Ki Gayi) Shartein Agar Jama Ho Jaayen, Tab Jaa Kar Kaffara Laazim Hota Hai. Agar In Mein Se Koi Ek Shart Bhi Na Paayi Jaaye, Toh Kaffara Laazim Nahin Hota... 

🤔 Ek Baar Phir Mukammal Taur Par Repeat Kar Diya Jaaye:

 

Kaffara Usi Waqt Laazim Hota Hai Jab Yeh 8 Ke 8 Shartein Paayi Jaayen:

① Ramazan Ka Ada Roza Ho...

② Janbujh Kar Roza Todha Ho...

③ Baghair Kisi Sharayi (Valid) Uzr Ke Roza Todha Ho...

④ Roza Todhne Ke Baad Koi Aisa Muamla Pesh Na Aaya Ho Jis Ki Wajah Se Baad Mein Roza Todhna Jayiz Ho Jaata Ho Ya Khud Ba-Khud Roza Toot Jaata Ho...

⑤ Roza Todhne Wala Masail Ka Jaanne Wala Ho, Bilkul La-Ilm Na Ho.....

⑥ Jo Cheez Khaayi Ho, Use Ba-Taur-E-Khana Khaaya Ho... Chahe Pet Bharne Ke Liye, Dawa Ke Liye, Taqat Haasil Karne Ke Liye Ya Sirf Mooh Ke Maze Ke Liye...

⑥ Yeh Khana Ya Pina Mooh Ke Zariye Hua Ho.

⑧ Roze Ki Niyat Raat Se Maujood Ho... 

⚠️ Note: Jab Yeh Puri 8 Ke 8 Shartein Ek Saath Paayi Jaayen, Tab Hi Kaffara Laazim Hota Hai. Warna Sirf Qaza Laazim Hoti Hai, Kaffara Nahin.

Continue… 

Ubaid-e-Raza Official

Ramazan Course (Part-64)

🌻 Kaffare Ka Mas’ala :

Agar Kisi Bande Par Kaffara Laazim Ho Jaaye, To Sab Se Pehle Us Par Yeh Zaroori Hai Ke Allah Ta‘ala Se Sachche Dil Se Tauba Aur Maghfirat Talab Kare. Yeh Samajhte Hue Ke Us Se Ek Bahut Bada Gunah Sarzad Ho Gaya Hai, Aur Aisa Hona Bilkul Nahin Chahiye Tha. Is Liye Sab Se Pehle Dil Se Nadamat Ke Saath Mu‘aafi Maangni Chahiye...

💐 Is Ke Baad Apni Zindagi Mein Kaffara Ada Karna Bhi Laazim Hai. Baghair Kaffara Ada Kiye Duniya Se Chala Jaana Bahut Khatarnaak Hai, Kyun Ke Khuda Na Khwaasta Agar Is Par Pakad Ho Gayi To Qiyamat Ke Din Sakht Giraft Ka Saamna Karna Padega.

🌻 Aksar Dekha Jaata Hai Ke Chhote Bachche Baad Mein Kuch Kha Pee Lete Hain. Isi Wajah Se Hukm Diya Gaya Hai Ke Farz Uloom Bachchon Ko Baligh Hone Se Pehle Hi Sikha Diye Jaayen, Taake Woh Aise Muamlaat Se Bach Saken. Kyun Ke Jab Kaffare Ka Mas’ala Bayan Hota Hai To Aadmi Par Khauf Taari Ho Jaata Hai.

💐 Asal Maqsood Toh Khauf-E-Khuda Paida Hona Hai, Lekin Kaffare Ka Bhi Ek Khauf Hota Hai, Khaaskar Jab 60 Rozon Ka Kaffara Sun Kar Aadmi Ghabra Jaata Hai Ke Itne Roze Kaise Rakhe Jaayen.

🌻 Aur Agar Kisi Shakhs Ne Kaffare Ke Roze Nahin Rakhe, Aur Na Hi Kaffare Ke Dusre Tareeqe (Jaise Ghareebon Ko Khana Khilana Ya Sadqa-e-fitr Ki Raqam Dena) Ada Kar Saka, To Phir Us Par Laazim Hai Ke Wasiyyat Kar Ke Mare.

💐 Wasiyyat Is Tarah Kare Ke: "Mere Zimmah Itne Roze Baaqi Hain" ... Yeh Zahir Karna Zaroori Nahin Ke Woh Kaffare Ke Roze Hain. Sirf Itna Keh Diya Jaaye Ke Mere Itne Roze Baaqi Hain, Meri Janib Se Har Roze Ke Badle Fidiya Nikaal Kar Kisi Gareeb Ko Sadqa Kar Dein...

Continue....

Ubaid-e-Raza Official

Ramazan Course (Part-65)

☘️ Roza Tootne Ke Baad Kuch Khane Peene Ka Mas’ala:

Ek Sawal Aaya Tha, Uski Yahan Wazahat Karti Chalun...Agar Galti Se Roza Toot Gaya, Ya Dawayi Lena Zaroori Tha Aur Dawayi Le Li, Phir Baad Mein Tabiyat Theek Ho Gayi...Ya Jaise Wuzu Karte Waqt Kulli Mein Paani Halaq Ke Andar Chala Gaya, Ya Naak Mein Paani Chadhate Hue Dimagh Ki Had Tak Pahunch Gaya,

Toh In Sooraton Mein Roza Toot Jaata Hai...

Chunki Yeh Sab Galti Se Hua Hota Hai, Is Liye Sirf Qaza Lazim Hoti Hai... Kaffara Nahi Hota..

🪻 Ab Sawal Yeh Paida Hota Hai Ke..Jab Roza Toot Gaya, Toh Kya Uske Baad Khaana-Peena Jaiz Hai?

Ya Phir Baqayda Roza Todhna Zaroori Hoga?

To Yaad Rakhein…!!

Jaise Hi Yeh Amal Ho Jaaye, Usi Waqt Aap Ka Roza Khatm Ho Jaata Hai..

Ab Yeh Zaroori Nahin Ke Aap Kuch Khaa-Pee kar Roza Todhein...Roza Khud Ba Khud Toot Chuka Hota Hai....

☘️ Jab Naak Mein Paani Chadh Gaya, Ya Halaq Se Paani Neeche Utar Gaya, Ya Kisi Ne Dawayi Ya Koi Cheez Khaa Li..Toh Roza Toot Gaya Aur Ab Us Roze Ka Koi Ta‘alluq Baaqi Nahi Rehta...Us Roze Ki Baad Mein Qaza Lazim Hogi..

Kisi Soorat Mein Sirf Qaza, Aur Baaz Sooraton Mein Kaffara Bhi Aa Sakta Hai...

🪻 Lekin…!!...Jo Roza Aap Ne Rakha Tha, Woh Us Waqt Hi Finish Ho Chuka Hota Hai...Ab Rahi Yeh Baat Ke...Jab Roza Toot Gaya, Toh Kya Ab Din Bhar Khaane-Peene Ki Ijazat Hogi?

Jawab: Nahin…!!...

Poora Din Rozedaar Ki Tarah Rehna Wajib Hota Hai...Iski Tafseel Next Post Mein Aayegi…

Continue…

Ubaid-e-Raza Official

Ramazan Course (Part-66)

🍀 Jab Roza Toot Gaya Ho, To Kya Khaane-Peene Ki Ijazat Hogi?

Toh Yaad Rakhein…!!..

Jab Is Tarah Galti Se Roza Toot Jaaye, Toh Poora Din Rozedaar Ki Tarah Rehna Wajib Hota Hai...Is Mein Se Chand Logon Ka Istisna (Exception) Hai, Jinki Wazahat Zaroori Hai..

🪷 ① Haiza Aurat:

Agar Koi Aurat Roze Se Thi Aur Dopahar Ya Din Ke Kisi Bhi Waqt Haiz Aa Gaya, Toh Uska Roza Toot Gaya..

Ab Haiza Aurat Ko Ijazat Hoti Hai Ke Jab Haiz Aa Chuka Hai To Khaa Le, Pee Le, Is Mein Koi Haraj Nahin..

🍀 ② Shadeed Bimar Shakhs:

Isi Tarah Agar Koi Shakhs Bahut Zyaada Bimar Tha, Usne Dawayi Waghairah Ki Wajah Se Roza Todh Diya..Aur Ab Us Par Bahut Zyaada Kamzori Aa Gayi Hai...Agar Woh Khana Peena Ya Mazeed Dawaiyan Nahin Lega Toh Bimari Badhne Ka Andesha Hai Aur Takleef Badhegi...Toh Is Soorat Mein Bhi Usko Khane Peene Ki Ijazat Hogi...

🪷 Lekin…!!...Haiza Aur Bimar Ke Ilawa Agar Koi Aur Soorat Ho...Jaise Galti Se Roza Toot Gaya...Ya La-Ilmi Mein Yeh Samjha Ke Roze Mein Yeh Kaam Jayiz Hai Aur Kar Liya.. Baad Mein Maloom Hua Ke Roza Toot Chuka Tha...

🍀 Toh In Tamaam Sooraton Mein Bande Par Lazim Hai Ke Baqiya Poora Din, Yaani Iftari Tak..Woh Khane-Peene Se Aur Jismani Ta‘alluq Wagairah Se Ijtenab Kare...

Yaani:

➡️ Na Kha Sakta Hai

➡️ Na Pee Sakta Hai

Continue…

Ubaid-E-Raza Official

Ramazan Course (Part-67) 

🤔 Galti Se Roza Toot Jaaye To Phir Khaane Peene Ki Ijazat Kyun Nahin Hai?

🪷 Iski Wajah Yeh Hai Ke Ramazan-Ul-Mubarak Adab Aur Ehtram Wala Maheena Hai. Is Maheene Ki Hurmat Ko Madde Nazar Rakhte Hue Shariat Ne Yeh Hukum Diya Hai Ke Agar Khuda Na Khwasta Roza Galti Se Toot Bhi Jaaye, Tab Bhi Ramazan Ka Adab Karte Hue Iftar Ke Waqt Tak Khane Peene Se Rukna Zaroori Hai. Yeh Rukna Wajib Ke Darje Mein Hai..

🌷 Agar Koi Shakhs Iske Bawajood Khata Peeta Rehta Hai To Woh Gunahgar Hoga Aur Use Tauba Karni Chahiye..

🪷 Toh Umeed Hai Yeh Baat Samajh Aa Gayi Hogi Ke Agar Galti Se Roza Toot Gaya Aur Koi Sharayi Uzr (Jaise Sakht Bimari Wagairah) Pesh Nahin Aaya, To Phir Poora Din Iftar Tak Rozedaar Ki Tarah Rehna Lazim Hai..

🌷 Maine Yeh Bhi Bataya Tha Ke Agar Roze Ke Dauran Haiz Shuru Ho Jaaye To Aurat Roza Todh Degi Aur Phir Woh Khaa Pee Sakti Hai. Lekin Agar Kabhi Aisa Ho Ke Aurat Haiz Se ..Din Ke Beech Paak Ho Jaaye..  Jaise 2 Baje Ya 3 Baje Paaki Hasil Ho... Toh Us Din Ka Roza To Ada Nahin Hoga Aur Baad Mein Qaza Rakhni Hogi.. Lekin Paaki Hasil Hone Ke Baad Se Le Kar Iftar Tak Khaane Peene Se Rukna Zaroori Hoga. 

🪷 Ramazan Ka Adab o Ehtram Karte Hue Use Rozedaar Ki Tarah Hi Din Guzarna Hoga...

Ab Next: Masam Aur Manfaz Ki Tafseel…

Continue…

Ubaid-e-Raza Official