Hajj o Umrah Course

 Hajj O Umrah Course (Part -1)

Hajj o Umrah Ki Fazeelat :

Sabse Pahle Main Umrah Ke Husool-e-Barkat Ke Liye Umra Ke Chand Fazail Aap Ko Bata Deti Hoon.

(1)  Sarkar ﷺ Ka Farman Hai : Ki Boodhe Kamzooron Aur Aurton Ka Jihad Hajj o Umra Hai. سبحان الله 

Ya'ani Jo Boodha Hota Hai Kamzoor Hota Hai Aurten Hoti Hain In Par Jihad Vagairah Lazim Nahi Hote Lekin Ye Agar Is Azeem Ibadat Ka Sawab Pana Chahte Hain To Unko Chahiye Ki Woh Hajj O Umrah Par Rawana Ho Jayen.

(2)  Isi Tarah Pyare Aaqa ﷺ Ka Farman Hai : Ki AllaH Ta'ala Ke Raah Ka Jo Gazi Hota Hai Jo Gazwaat Vagairah Me Jata Hai Isi Tarah Hajj Aur Umrah Karne Wala Jo Shakhs Hota Hai Ye AllaH Ta'ala Ka Mahmaan Hota Hai. Itni Badi Fazilat Umrah Karne Wale Aur Hajj Karne Wale Ko Di Gai Hai.

Aur Sarkar ﷺ Farmate Hain : Ye AllaH Ke Mahmaan Hote Hain Jab AllaH Inhe Bulata Hai To Fir Woh Labbaik Kahte Hain To Ye Labbaik Kahna AllaH Ta'ala Ke Bulawe Par Hota Hai Aur Jab Woh Isse Kuchh Mangte Hain To AllaH Ta'ala Inhe Ata Farmata Hai. سبحان الله

Continue...

https://t.me/Hajj_o_umrah_course

Ubaid-e-Raza Official 

Hajj O Umrah Course (Part -2)

Hajj o Umrah Ki Fazeelat :

(3) Sarkar ﷺ Ne Farmaya : Hajj o Umrah Paey Dar Paey Ya'ani Aik Ke Baad Dusra Ada Kar Liya Karo Kyun Ki Ye Gurbat Ko, Gunahon Ko Is Tarah Mita Data Hai Jaise Bhatti, Sone, Chandi Or Lohe Ka Jang Door Kar Deti Hai Isi Tarah Umrah Or Hajj Bande Se Gurbat Ko Bhi Door Kar Deta Hai Or Gunahon Ko Bhi Door Kar Deta Hai. Yani Ye 2 Ibadate Ayesi Hain Jinke Badaolat Banda Duniyawi Fayde Bhi Hasil Karta Hai Or (Ukhrawi) Aakhirat Me Bhi Iska Fayda Naseeb Hota Hai.

Ye Chand Fazail Meine Aap Ke Samne Pesh Karne Ki Sa'adat Hasil Ki Ab ان شاء الله Hum Fiqhi Masail Ki Taraf Aa Jate Hain. Sabse Pahle Umrah Ke Masail Sikhenge Uske Baad Hajj Ke.

Umrah Ke Ahkaam :

Umrah Ki Tareef (Definition) Kya Hai.!?

Halate Ahraam Me Khana-e-Kaabe Ka Tawaf Aur Safa O Marwa Ki Saee Karna Umrah Kahlata Hai..!!

Ab Isme 3 Baatein Maine Zikar Ki : Aik Halate Ahraam Iski Tafseel Main Aap Ko Batati Hoon, Dusri Khana-e-Kaabe Ka Tawaf Karna Jo 7 Fere Hum Lagate Hain Ye Umrah Me Shamil Hai, Or Teesri Saee Karna Safa o Marwa Ke Darmiyan Jo 7 Chakkar Lagaaye Jate Hain Ye Bhi Umrah Ka Hissa Hai.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -3)

Umrah Ke Ahkaam :

Ab Ye Teen Cheezon Ke Darze Bhi Main Aap Ko Samjha Deti Hoon Yani Ye Cheezen Kya Hain.!?

Sabse Pahle Ahraam : Yani Halate Ahraam Me Hona Ye Umrah Ke Liye Shart (Condition) Hai Or Yaad Rakhen Ki Koi Bhi Ibadat Shart Complete Kiye Bigair Start Hi Nahi Hoti.

Jaise Aap Jante Hain Na Namaz Ke 6 Sharait Hain : Taharat Hai, Sitre Aurat Hai, Istiqbale Qiblah Hai, Niyyat Hai, Waqt Hai. Agar Inme Se Aik Bhi Cheez Kam Rah Gai To Aap Ki Namaz Shuru Hi Nahi Hoti Agar Kisi Bande Ne Niyyat Bhi Kar Liya Waqt Bhi Hai Sab Kuch Hai Lekin Woh Napak Hai To Kya Uski Namaz Shuru Hogi? Nahin.. Kyunki Taharat Wali Shart Chhoot Gayi, To Ye Sharait Woh Cheezen Hoti Hain Ke Agar Inko Aap Complete Karte Hain Tab Aap Ki Ibaadat Start Hoti Hai Warna Ibadat Start Nahi Hoti.

To Umrah Ke Liye Shart Ye Hai Ki Banda Halate Ahraam Me Ho Agar Ahraam Ki Halat Nahi Hai To Fir Bande Ka Umrah Ada Hi Nahi Hota. Agar Ahraam Ki Niyyat Vagairah Kuch Nahi Ki Hai Fir Jaaye Bhale Bas Woh White Chadar Jo Mard Pahente Hain Unho Ne Pahen Liye Aurat Ke Liye Waise Bhi Koi Khaas Dress Nahi Hai To Gaye Or Kabe Ka Tawaf Kar Liya Saee Kar Liya Or Halq Karwa Liya To Ye Umrah Nahi Kahlayega, Kyun.!?

Kyun Ke Yahan Par Woh Halate Ahraam Me Tha Hi Nahi Bas Usne Ahram Pahna Tha Ahraam Vagairah Ki Niyyat Nahi Ki Thi Ab Ye Uska Umrah Ada Nahi Hua Kyunki Shart Halate Ahraam Ki Thi, To Ahraam Ki Halat Me Hona Ye Shart Hai Agar Ye Condition Bande Ne Puri Nahi Ki Ya Fir Ahraam Sahi Tariqe Se Jis Tarah Karna Hai Us Tarah Nahi Kiya To Woh Umrah Hi Ada Nahi Hoga.

Aur Ye Itna Stress De Kar Main Isliye Bata Rahi Hoon Kyunki Ye Ayesa Nahi Hai Ke Log Isme Galtiya Nahi Karte Hain, Kuch Maah Pahle Hi Galiban Mere Paas Aik Sawal Aaya Tha Jisse Samajh Me Aa Raha Tha Ki Jo Haji Hajj Par Gaye Hain Unho Ne Ahram Hi Nahi Bandha Tha Hajj Ke Liye Yani Mukammal Hajj Kar Liya Hai Hajj Ho Gaya Arfaat Chale Gaye, Mina Chale Gaye, Mujdalfa Chale Gaye, Qurbani Kar Li Sab Kuch Ho Gaya Lekin Hajj Ka Ahraam Hi Nahi Bandha Tha To Fir Woh Hajj Nahi Hua Kyunki Jis Tarah Umrah Ke Liye Ahraam Shart Hai Isi Tarah Hajj Ke Liye Bhi Ahraam Pahenna Shart Hai Jab Shart Hi Puri Nahi Hui To Hajj Hi Nahi Hua To Woh Jana Aana Kya Hua? Bas Woh Gaye Or Aaye Hajj Jo Farz Tha Ab Bhi Woh Farz Baki Hi Raha.

To Ye Main Important Condition Hai Ki Banda Halate Ahraam Me Ho.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -4)

Umrah Ke Ahkaam :

Dusra Tawaf Karna : Tawaf Karna Umrah Me Farz Ke Darze Me Hai Yani Agar Koi Banda Makka Jata Hai Halate Ahraam Me Hota Hai Tawaf Nahi Karta Ya Fir Aadha Chakkar Laga Liya Aik Chakkar Laga Liya Usse Zyada Kuch Nahi Kiya Fir Saee Kar Liya Or Wapas Aa Gaya To Ye Bhi Umrah Hi Nahi Hoga. Kyun..? Kyunki Umrah Me Tawaf Farz Hai Or Farz Complete Kiye Bigair Koi Ibadat Complete Nahi Hoti Shuru To Ho Jayegi Lekin Woh Ibadat Complete Nahi Hogi.

Jis Tarah Namaz Me Agar Aap Ne Pure Sharait Complete Kar Ke Aap Ne Namaz Shuru Kar Liye To Namaz To Shuru Ho Gai Lekin Agar Namaz Me Koi Ruku Chhod Diya Koi Sajda Chhod Diya Janbujh Kar Chhod Diya Ya Bhool Gaye Or Baad Me Sajda E Sahaw Bhi Nahi Kiya To Ye Tamam Mamlaat Me Aap Ki Namaz Hi Consider Nahi Hoti, Ye Ayesa Hai Ki Aap Ne Woh Namaz Hi Nahi Padhi Hai.. Isi Tarah Umrah Me Tawaf Farz Hota Hai Agar Tawaf Mukammal Nahi Hua To phir Aap Ka Umrah Hi Ada Nahi Hoga.

Tisra Saee Karna : Safa o Marwa Ke Darmiyan Saee Karna Ye Wajib Ke Darze Me Hai Agar Saee Durust Tariqe Se Nahi Ada Ki Gayi To phir Bande Par Dam Lazim Ho Jata Hai. Dam Kya Hai Kin Surton Me Dam Lazim Aayega Ye Hum ان شاء الله Aage Tafseel Se Bayan Karenge.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -5)

Ahraam Ke Ahkaam :

Halate Ahraam Me Kabe Ka Tawaf Karna Aur Saee Karna Ye Umrah Hai. Ab Aik-aik Kar Ke Hum Bayan Karte Hain, Halate Ahraam Pahle Aa Gaya To Ahraam Ki Tafseel Padh Lete Hain Uske Baad Tawaf Or Saee Ki Taraf Aayenge.

To Shart Kya Hai.!? Ahraam.! 

Ahraam Ki Definition Kya Hai.!? 

Dekhiye Hum Kisko Ahram Kahte Hain Mard Hazraat White Colour Ki Jo 2 Chadar Pahente Hain Aik Tahband Hoti Hai Or Aik Upar Jo Cover Karne Ke Liye Hota Hai Hum Isko Ahraam Kahte Hain. Isi Tarah Aurtain Kuch Scarf Pahen Leti Hain White Colour Ki Ya Fir Koi Fixed Typ Ki Scarf Hoti Hai Usko Ahram Kahte Hain. Ye Hum Bolne Ke Liye Bolte Hain Ki Ye Ahraam Ke Kapde Hain.

Asal Me Shariat Ne Ahraam Kisko Kaha Hai.!?

Shariat Ke Mutabik Ahraam : Jab Banda Hajj Ya Umrah Ya Dono Ki Niyyat Kar Ke Talbiya Padh Le To Kuch Halaal Cheezein Bhi Us Par Haram Ho Jati Hai Isko Ahraam Kahte Hain. Ahraam Aik Haalat Hoti Hai. Ye Kapda Pahen Lena, Hum Kahte Hain Ki Ahraam Pahen Liya Lekin Ahraam Ke Jo Rules Hote Hain Woh Kab Start Hote Hain?? Jab 2 Cheezen Puri Ho Jayen ¹Hajj Ya Umrah Ki Niyyat Ho Jaye Ya Hajj o Umrah Ki Aik Sath Niyyat Ho Jaye + ²Talbiyah Padhna Ye Dono Cheezen Jab Aik Sath Ho Jayenge Na To Bande Par Aik Halat (Kayfiyat) Aa Jati Hai To Woh Halate Ahraam Kahlata Hai.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -6)

Ahraam Ke Ahkaam :

Talbiyah Kise Kahte hain.!? Labbaik Padhne Ko Talbiyah Kahte Hain.

لَبَّيْكَ اللّٰهُمَّ لَبَّيْكَ لَبَّيْكَ لَا شَرِيكَ لَكَ لَبَّيْكَ إِنَّ الْحَمْدَ وَالنِّعْمَةَ لَكَ وَالْمُلْكَ لَا شَرِيكَ لَكَ

Ahraam Kya Hai.!? Woh Halat Ki Jab Banda Hajj Ya Umrah Ki Niyyat Kar Le + Talbiyah Sath Me bol Le Phir Us Par Aik Halat Taari ho Jati Hai Jiske Baad Bande Par Kuch Halal Cheezein Bhi Haram Ho Jati Hain To Usko Hum Kehte Hain Banda Halate Ahraam Me Aa Gaya. 

Halal Cheezein Haram Ho Jati Hain Matlab.? Misal Ke Taur Par Khushboo Lagana: Khushboo Lagana Halal Hai Ya Haram.? Halal Hai Na.. Lekin Jab Banda Ahraam Ki Halat Me Aa Jata Hai Niyyat Vagairah Kar Leta Hai Aur Talbiyah Padh Leta Hai To Ab Khushboo Lagana Us Par Haram Ho Gaya, Isi Tarah Mard Hazraat Ke Liye  Sile Huwe Kapde Pahenna : Normally To Jayez Hai Na.? Lekin Jab Halate Ahraam Me Aa Gaye To Unke Liye Woh Pahenna Haram Ho Gaya, Isi Tarah Chahre Ko Kisi Cheez Se Cover Kar Lena : Ab Hum Ayese Hi Baithe Hain Dupatta Le Kar Maine Apne Chahre Par Rakh Liya To Ye Jayez Hai Ya Najayez.? Jayez Hai Chahre Par Dupatta Rakh Lo Koi Problem Nahi Hai Balke Aurat Par Bahar Jate Waqt Pura Sharai Parda Karna Ye To Wajib Ke Darze Me Hai. Lekin.!! Halate Ahraam Me Ye Jayez Cheez Bhi Haram Ho Jati Hai To Isko Kahte Hain Halate Ahraam.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -7)

Ahraam Ke Ahkaam :

To Ahraam 2 Cheezon Ka Naam Hai ¹Hajj Ya Umrah Ki Niyyat Karna + ²Talbiyah Kahna Yani Pura Labbaik Aik Martaba Padhna Ye Lazim hai.

Jab Ye 2 Cheezen Pai Jayengi To Banda Ahraam Ki Halat Me Aata Hai Aur Inme Se Agar Aik Bhi Cheez Rah Gai To Banda Woh Lakh Ahraam Pahen Le Lakh Umrah Vagairah Kar Le Kuch Bhi Kar Le Lekin Uska 'Halate Ahraam' Ye Strat Hi Nahi Hoga.

Iska Matlab Hai Agar Kisi Mard Ne Kurta Payjama Vagairah Pahna Hai Aur Usne Umrah Ki Niyyat Se, Niyyat Dil Me Kar Li Ke Main Umre Ke Liye Ja Raha Hun Aur Phir Uski Niyyat Se Labbaik (لَبَّيْكَ اللّٰهُمَّ لَبَّيْكَ) Pura Padh Liya To Phir Ahraam Ki Halat Me Aa Gaya Agarche Insne Jo Kapde Pahne Hain Nahi Pahenna Chahiye Lekin Ahraam Ki Halat Start Ho Jaayegi.

Chadron Ko Ahraam Bolna Ye Bas Hamare Bol Chal Me Hai Asal Ye Halat Hoti Hai.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -8)

Ahraam Ke Ahkaam :

Mardon Ka Jo Ahraam Hota Hai Jo Chadar Ki Baat Hoti Hai Ye Aap Jante Hain 2 Kapde Hote Hain Aur Woh 2 Kapde Kaise Honge.? Mard Ke Jo Ahraam Ke Kapde Honge Ye 2 Safed Begair Sile Chadar Hote Hain Inko Hum Ahram Kehte Hain Aik Tahband Ki Tarah Lapeta Jata Hai Aur Aik Upar Se Woh Jo Pahente Hain Ye Hai Mardo Ka Ahraam.

Aurton Ke Liye Maine Bataya Ki Aurton Ke Liye Khas Koi Dress Nahi Hai Jisko Hum Ahraam Kah Sakte Hain, Lekin Haan Ye Hai Ki Aurat Ko Apna Sitr Cover Karna Hai Aur Chahra Khula Rakhegi Aurat, Halate Ahram Me Chahra Cover Karne Ki Ijazat Nahi Hai, Chahra Cover Karna Haram Hota Hai. 

To Face Ka Jo Area Hai Jitna face Hai Yani Jo Wuzu Me Aap Dhote Hain Na Woh Aap Ka Chahra Hota Hai. To Ye Chahra Aap Ka Open Rahega aur Iske Alawa Cheez Aap Cover Kar Sakte Hain To Ye Sawal Aata Hai Aurten Gloves Pahen Sakti Hain Ya Nahi.? Socks Pahen Sakti Hain Ya Nahi.? To Ji Han Ye Aurten Pahen Sakti Hain Lekin Face Open Rakhna Ye Zaruri Hai.

Auraton Ke Liye Koi Khaas Ahraam Nahi Hai, Mardon Ke Liye 2 Begair Sili Hui Chadre Hain, Sili Huwe Nahi Hona Chahiye.

Continue...

https://t.me/Hajj_o_umrah_course

Ubaid-e-Raza Official 

Hajj O Umrah Course (Part -9)

Ahraam Ke Ahkaam :

Umrah Par Bachhon Ko Sath Me Le Kar Gaye Hain To Bachhon Ka Ahraam Kya Hai.!?

To Dekhiye Nabalig Bachhe Chunke Ahkam e Shariyya Ke Paband Nahi Hote Yani In Par Lazim Nahi Hota Ki Ye Shariat Ke Rules Follow Karen. To Inke Liye Koi Ahram Pahnana Zaroori Nahi Hota Haan.!! Behtar Hai Ki In Bachhon Ko Ahram Pahna Liya Jaye Jaise Thode Bade Bachhe Hote Hain Jo Ye Ahraam Vagairah Sambhal Sakte Hain To Agar Ayesi Surate Haal Hai To Inko Ahram Pahna Kar Le Ja Sakte Hain.

Aur Agar Inke Ahram Ke Rules Follow Nahi Hote Tab Bhi Koi Kaffara Vagairah Nahi Hai, Na Koi Gunah Hai, Lekin Inki Tarbiyat Ke Liye Inko Sikhane Ke Liye Walidain Ko Chahiye Unko Sikhate Huwe Jayen Ki Ahram Me Ye -Ye Cheezen Nahi Karte Taki Unko Woh Pahle Se Yaad Rahe, Lekin.!! Phir Bhi Agar kisi Bachhe Se Koi Kaam Vagairah Ayesa Ho Jata Hai Jo 'Ahraam' Ke Khilaf Hai To Isme Na Walidain Gunahgar Hain Na Woh Bachha Gunahgar Hai, To Bachhon Ke Liye Bhi Koi Khaas Ahram Nahin Hota, Agar Pahna Le To Thik Hai Warna Ayese Normal Dress Me Bhi Bachhon Ko Le Kar Ja Sakte Hain. ⚠️ Haan.!! Agar Balig Hai To Phir Woh Ahraam Vagairah Pahnega.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -10)

Ahraam Ke Ahkaam :

Jo Nabalig Bachha Hai Isko Umrah Par Le Jane Ka Hukum Pahle Aap Samajh Len :

Bahut Se Log Bachhon Ko Makkah Mukarramah Madina Munawwarah Le kar Jate Hain Aur Woh Chhota Sa Bachha Hai 2 Saal Ka 4 Saal Ka Isko Bhi Ahram Pahnate Hain Woh Pura Tawaf Vagairah Kya Karte Hain Bachhon Ke Abbu Apne Shoulder Par Bitha Kar Ya God Me Lekar Kisi Bhi Tarah Woh Pura Umrah Kar Lete hain. Halanki..!! Yaa Rakhiye Ye Jayez Nahi Hai Bahut Jo Chhote Bachhe Hote Hain Inko Kisi Bhi Masjid Me Le Jane Ki Ijazat Nahi Hai Aur Fir Woh To Makkah Aur Madina Hai Makka Jahan Par Aik Gunah Aik Lakh Gunah Ke Barabar Hai To Woh To Muqaddas Zameen Par Bande Ko To Aur Zyada Khayal Karna Chahiye.

⚠️ Dekhiye Itna Chhota Bachha Jo 2 Saal Ka Ho 3 Saal Ka Ho Ki Bilkul Washroom Nahi Ja Pata Jinko Daipers Vagairah Pahna Kar Le Kar Jate Hain Jinko Bilkul Yani Washroom Vagairah Ki Tameez Abhi Aai Nahi Hai Kabhi Bhi Ulti Kar Sakte Hain Kabhi Bhi Daipers Leak Ho Sakte Hain Aur Shoro Gul Kar Rahe Hain, Chilla Rahe Hain, Toh Ayese Bachhon Ko Masjid Me Le Kar Jana Gunah Hai. Balke Sakht Mana Kiya Gaya Hai Ayese Bachhon Ko Masjid Me Le Kar Jana Ye Haram Hai To Fir Woh To Makka e Mukarramh Aur Madina e Munawwarah Hai.

Madina e Munawwarah Me To khair Aik gunah Aik Lakh Ke Barabar Nahi Hai Lekin Bahrahal Ye Rasulullah ﷺ Ki Mubarak Masjid Hai To Yahan ka Bhi Adab Aap Par Bahutt Zyada Khayal Zaruri Hai Aur Makkah Me Ke Masjid Me Aik Gunah Aik Lakh Gunah Ke Barabar Hai To Ayesi Suraton Me Bachhon Ko Masjid Le Kar Na Jaye.

Continue...

https://t.me/Hajj_o_umrah_course

Ubaid-e-Raza Official 

Hajj O Umrah Course (Part -11)

Ahraam Ke Ahkaam :

Fir Isme Sawal Ye Aata Hai Ki Bachhon Ka Kya Karen.!? Kabhi Kabhaar Chhote Bachhe Hote Hain To Inko Sath Me Le Kar Hi Jana Padta Hai To Fir Kya Karen.!?

To Fir Is Surat Me Ye Hoga Ki Bachhe Ke Sath Koi Aik Bahar Ruk Jaye Aur Dusra Woh Banda Ja Kar Apna Umrah Complete Kar Ke Aa Jaye Fir Woh Apne Bachhe Ko Sambhale Aur Dusra Banda Ja Kar Woh Apna Umrah Complete Kare Ye Soorat Ho Sakti Hai. To Bahar Aap Le Kar Baith Sakte Hain Majburan Kyunki Mazburi Hai To Bahar Ki Taraf Le Kar Baithey Masjid Ki Taraf Andar Le Kar Na Jaye.

Phir Isme Ye Bhi Sawal Aata Hai Ke Bahut Khayal Rakhte Hain Ki Daipers Leak Na Ho Tab Bhi Nahi Le Kar Ja Sakte Hain.!? 

Tab Bhi Yahi Hukum Hai Ki Aap Chhote Bachhon Ko Masjid Me Nahi Le Ja Sakte.  Achha..!! Ayesa Nahi Hai Ki Bachhe Ko Lana Bahut Bada Zurm Hai Ya Baaz Log Samajhte Hain Chhota Bachha Hai Isko Masjid Me Kyun Nahi Le Ja Sakte.? Wajah Yahi Hai Ki Masjid Jo Hai Bahut Hi Muqaddas Zameen Hoti Hai Yahan Par AllaH Ta'ala Ki Hum Ibadat Karte Hain To Isko Har Tarah Ki Napaki Se Bachana Ye Zaroori Hai Aur Bachhe Diaper Vagairah Pahen Lete Hain Theek Hai Lekin Chances Bhi To Hain Ki Diaper Leak Ho Jaye Bachha Ulti Kar Le Aur Masjid Napaak Ho Jaye To Ye Chance Bhi Nahin Lena Isliye Mana Hai.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -12)

Ahraam Ke Ahkaam :

Aur Dusra Isliye Ke Sarkarﷺ Ne Wajeh Taur Par Farma Diya Hai Ke Masjid Ko Bachhon Paglon Aur Khareed o Farokht Karne Walon Aur Buland Aawazon Se Bachao. To Masjid Me Bachhe Jo Shoro Gul Karte Hain Kuch Nahi To Bachhe Khamoshi Thodi Baithte Hain Kabhi Bhagam Daud Kar Liya Kabhi Chillana Ho Gaya Rona Dhona Ye Hota Hai Na.. To Masjiden Is Liye Nahi Bani, To Isliye Itne Chhote Bachhe Jo Washroom Vagairah Nahi Ja Pa Rahe Unko Le Kar Jana Mana Hai.

Aur Agar Bilfarz Washroom Vagairah Ja Sakte Hain Jaise 5 Saal 6 Saal Ke Ho Gaye Jo Samajhte Hain Washroom Jana Hai Lekin Abhi Ye Samajh Me Nahi Aai Ki Masjid Me Khamoshi Se Baithna Hai Bahut Zyada Bhagam Daud Cheekh Pukar Ye Karenge To Ayese Bachhon Ko Bhi Masjid Me Le Kar Jana Makrooh e Tahreemi Hai Mana Hai. In Bachhon Ko Bhi Le Kar Hum Masjid Me Nahi Jayenge.

Haan..!! Takriban 7 Saal Ka Bachha Jo Masjid Ke Aadaab Ko Samajhta Bhi Hai Aur Washroom Wagairah Ka Bhi Woh Khayal Kar Sakta Hai To Takriban 7 Saal Ka Agar Bachha Hai To Phir Usko Aap Apne Sath Le Ja Sakte Hain Balke Ayese Bachhe Ko Le Kar Jana Behtar Hota Hai Taki Hum Unko Sikha Sake Ki Masjid Ka Adab Kya Hai Masjid Me Hum Kya Karenge Namaz Padhenge Aur Umrah Vagairah Woh Sikhega To Woh Sikhane Ke Liye Tarbiyat Ke Liye 7 Saal Ka Takriban Agar Koi Bachha Hai Aur Woh Samjh Rakh Raha Hai Washroom Vagairah Ja Pa Raha Hai Aur Masti Vagairah Bilkul Nahi Karega To Phir Ayese Bachhe Ko Aap Le Kar Jaye Aur Unki Taribiyat Karen.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -13)

Ahraam Ke Ahkaam :

Hum Bachhon Ko Masjid Ke Andar Nahi Le Kar Ja Sakte Halate Ahraam Me Ho Ya Waise Bhi Kahin Par Bhi Hum Bachhon Ko Masjid Me Nahi Le Ja Sakte Ye To Samajh liya. Lekin.!! Kya Safa Marwah Par Chhote Bachhon Ko Le Kar Ja Sakte Hain Ya Nahi.!?

Yaad Rakhen.!! Ye Jo Safa Marwa Ka Area Hota Hai Ye Masjide Haraam Ke Andar Dakhil Nahi Hai Yani Ye Masjid Ka Hissa Nahi Hai Is Par Woh Masjid Wale Rules Apply Nahi hote Jo Normally Masjid Me Apply Hote Hain Yani Masjid Me Kya Hota Hai Ki Masjid Ka Jo Adab o Ahtraam Rakhna Hai Waise To Har Jagah Ka Rakhna Hai Lekin Jo Masjid Ka Khaas Rule Hota Hai Ki Wahan Adab o Ahtraam Rakhenge, Wahan Na Koi Janabat Wala Shakhs Ja Sakta Hai, Na Koi Haiz Wali Aurat Ja Sakti Hai Ye Tamam Cheezen Masjid Ke Rules Me Aate Hain Na To Ye Safa o Marwa Par Apply Nahin Hote.

Safa o Marwa Par Haiza Aurat Bhi Ja Sakti Hai Aur Isi Tarah Bachhon Ko Bhi Aap Le Kar Ja Sakte Hain Kyunki Ye Masjid Ke Hisse Me Dakhil Nahi Hai Lekin Wahan Par Bhi Ahtiyat Karni Chahiye Ki Bachhe Ka Phir Bahut Zyada Cheekhna Pukarna Chillana Dusron Ko Takleef Dena Ye Na Ho, To Dusre Jo Umrah Karne Wale Hain Inka Khayal Kartey Hain.  Ye Na Ho Ki Unko Disturb Ho Thoda Bahar Hi Sahen Ki Taraf Baith Liya Jaye Warna Phir Aap Wahan (Safa o Marwa) Par Ja Kar Baith Sakte Hain Kyun Ke Ye Area Khaas Masjid Ke Andar Dakhil Nahi Hai. 

Isi Tarah Jaise Maine Kaha Haiz Wali Aurten Bhi Yahan Par Ja Kar Baith Saktin Hain Jo Safa o Marwa Ka Area Hai.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -14)

Ahraam Ke Ahkaam :

Ab Aate Hain Niyyat Ki Taraf : Ab Maine Kya Kaha Ahraam Jo Hai Isme Aik Hota Hai Niyyat Karna Dusra Hota Hai Labbaik Kahna.

Ab Niyyat Ke Main Aap Ko Kuch Rules Bata Deti Hoon : Niyyat Dil Ke Irade Ko Kahte Hain Yani Dil Me Aap Aik Pakka Irada (Decision) Kar Len Ki Main Ye Ibadat Kar Rahi Hoon, Isko Niyyat Kahte Hain. Zuban Se Niyyat Ke Shabd (Words) Bolna Ye Zaruri Nahi Hota Hai Dil Hi Dil Me Agar Bande Ne Niyyat Kar Li Ki AllaH Ta'ala Main Teri Riza Hasil Karne Ke Liye Umrah Par Ja Rahi Hoon, Umrah Ki Niyyat Kar Rahi Hoon Ye Jo Ahraam Pahen Rahi Hoon Mere Umrah Ke Liye Hai To Phir Uski Niyyat Ho Jayegi.

Haan.!! Dil Me Niyyat Hote Huwe Zunan Se Alfaaz Bol Lena Ye Mustahab Hota Hai, Achha Kaam Hota Hai. Agar Aap Karenge To Sawab Milega. Lekin.!! Lazim o Zaroori Nahi Hai Dil Hi Dil Me Agar Niyyat Kar Li Tab Bhi Niyyat Ho Jaayegi 

Aur Second Baat Arbi Ke Alfaaz Bolna : Jab Zaban Se Bolna Hi Zaroori Nahi Hai To Phir Arbi Ke Alfaaz Bolna Ye Bhi Zaruri Nahi Hai. Baaz Log Parshan Rahte Hain Ke Arbi Me Niyyat Nahi Ki To Kya Ahraam Ki Halat Me Aaye Ya Nahi.? Ye Bhi Yaad Rakhen Ki Arbi Me Niyyat Karna Ye Zaruri Nahi Hota Agar Kar Len To Thik Hai Agar Na Bhi Kare Urdu Me Bhi Agar Aap Ne Zaban Se Bol Liya Ki Allah Ta'ala Teri Riza Ke Liye Main Umrah Ke Ahraam Ki Niyyat Kar Rahi Hoon Tab Bhi Niyyat Ho Jaayegi.

Continue...

https://t.me/Hajj_o_umrah_course

Ubaid-e-Raza Official

Hajj O Umrah Course (Part -15)

Ahraam Ke Ahkaam :

Aur Arbi Me Umuman Umrah Ki Niyyat Karne Ke Liye Ye Duaa Padhi Jati Hai : 

اَللّٰهُمَّ اِنِّىْٓ اُرِيْدُ الْعُمْرَةَ فَيَسِّرْهَالِىْ وَتَقَبَّلْهَا مِنِّىْ وَاَعِنِّىْ عَلَيْهَا وَبَارِكْ لِىْ فِيهَا نَوَيْتُ الْعُمْرَةَ وَاَحْرَمْتُ بِهَا لِلّٰهِ تَعَالیٰ

To Ye Arbi Me Niyyat Kar Li Jati Hai Lekin Chunki Umuman Arbi Aati Nahi Hai To Niyyat To Kar Li Lekin Kya Padha Hai Ye Bilkul Samajh Me Nahi Aata Hai To Duaae Agar Aap Padh Bhi Rahe Hain Na To Aik Martaba Urdu Me (Tarjuma) Bhi Padh Len Taki Aap Ko Samajh Me Aa Jaye Ki Aap Kya Niyyat Kar Rahe Hain

Tarjuma : اَللّٰهُمَّ اِنِّىْٓ اُرِيْدُ الْعُمْرَةَ Aye Allah عزوجل Main Umrah Ka Irada Karti Hoon, فَيَسِرْهَالِىْ Tu Ise Mere Liye Aasan Farma De وَتَقَبَّلْهَا مِنِّىْ Aur Is Umrah Ko Meri Taraf Se Qubool Farma Le وَاَعِنِّىْ عَلَيْهَا Aur Ise Ada Karne Ke Liye Tu Meri Madad Farma وَبَارِكْ لِىْ فِيهَا Aur Aye Mere AllaH عزوجل Isme Mere Liye Barkat Ata Farma نَوَيْتُ الْعُمْرَةَ Main Niyyat Karti Hoon Umre Ki وَاَحْرَمْتُ بِهَا لِلّٰهِ تَعَالیٰ Aur AllaH Ta'ala Ke Liye Iska (Yani Umre Ka) Ahram Main Bandhti Hoon.

To Ye Hai Ki Hum AllaH Ta'ala Se Duaa Bhi Kar Rahe Hain Ki Maula Ta'ala Hum Umre Ka Irada Rakh Rahe Hain, Tere Waste Ahraam Bandh Rahe Hain, Tu Isme Hamari Madad Bhi Farma, Ise Qubool Bhi Farma, Isme Aasani Bhi Ata Farma Aur Isme Hamare Liye Barkaten Bhi Ata Farma Ye Niyyat Ho Gai.

Continue...

https://t.me/Hajj_o_umrah_course

Ubaid-e-Raza Official